"కరోనా వైరస్‌ విషయంలో మనం కంగారు పడాల్సిన అవసరం లేదు. అతిగా ఆలోచిస్తే స్థిమితంగా ఉండలేం. మేం ఇప్పటివరకు ఎన్నో ఫైట్లు చేశాం. చూశాం. కానీ కరోనా విలన్‌తో ఫైట్ చాలా కొత్తగా ఉంది. మేం అసలు కరోనాకు ప్రాధాన్యం ఇవ్వడం లేదు. ఎప్పటిలాగే మా పనులు మేం చేసుకుంటున్నాం. ఇప్పుడు విలన్ కరోనా కాదు.. జనంలో ఉన్న భయమే పెద్ద విలన్ అని మా అభిప్రాయం. అందుకే ప్రతి ఒక్కరూ హీరోలై మనలో ఉన్న భయమనే విలన్‌ను చంపేయాలి" అంటున్నారు ప్రముఖ ఫైట్‌మాస్టర్లు రామ్లక్ష్మణ్. రూపాలే కాదు, భావాలు, జీవన విధానాలు ఒక్కటై సాగుతున్న రామ్ లక్ష్మణ్‌లు లాక్డౌన్లో ఎలా గడిపారు? కొవిడ్‌ నిబంధనల నేపథ్యంలో సినిమాల్లోని పోరాట దృశ్యాల్లో వచ్చే మార్పులేంటి? తదితర విషయాలపై వారి అభిప్రాయాలు తెలుసుకుందాం రండి.
లాక్డౌన్లో ఏం చేశారు?
ఈ మూడు నెలలు చీరాలలోని మామిడి తోటల్లోనే గడిపాం. చిత్ర పరిశ్రమలోని కార్మికులంతా ఆరోగ్యంగా ఉండాలి, ఎలాంటి ఇబ్బంది పడకూడదని దేవుణ్ని వేడుకుంటున్నాం. నెల రోజుల కిందటే హైదరాబాద్‌ వచ్చాం. కరోనా ఎంత తొందరగా పోతే అంత త్వరగా ఇండస్ట్రీలో పనులు మొదలవుతాయి.
తాకకుండానే విలన్లను కొట్టొచ్చు
గ్రాఫిక్స్‌ పెరిగాక విలన్లను తాకకుండానే హీరో ఫైట్ చేయొచ్చు. హీరో ఒక చోట ఉంటాడు. విలన్లు వేరే చోట ఉంటారు. చారిత్రక, పౌరాణిక సినిమాల్లో ఇది బాగా కుదురుతుంది. అలాంటి టెక్నాలజీ ప్రస్తుతం అందుబాటులోకి వచ్చింది. ఫైటర్స్‌ పై ఒకసారి, హీరోపై ఒకసారి కంపోజ్‌ చేసి కలపొచ్చు.
వ్యాక్సిన్‌ వస్తేనే... హీరోలు ముందుకొస్తారు
వ్యాక్సిన్‌ వస్తేనే హీరోలు షూటింగ్‌ చేయడానికి ముందుకొస్తారు. అయినా రిస్క్‌ తీసుకొని వచ్చి చేయాల్సినంత అవసరం లేదు. సాధారణంగా పెద్ద హీరోలు ఒక సినిమా రిలీజ్‌ అయ్యాక మరో సినిమాకు 6 నెలలైనా గ్యాప్‌ తీసుకుంటారు. ఆ గ్యాపే తెలియకుండా సంవత్సరం వచ్చిందని అనుకుంటే సరిపోతుంది. వాళ్లు ఇంట్లో కూర్చోవడం వల్ల ఎలాంటి సమస్య లేదు. ఈ సమయంలో చాలా మంది దర్శకులు కొత్త కథలు సిద్ధం చేసుకుంటున్నారు.
నా హీరో కొత్తగా కొట్టాలి
"అల వైకుంఠపురములో' చిత్రంలో చున్నీ ఫైట్ మా కొత్త ఆలోచనకు ఉదాహరణ. ఉతికి ఆరేశాడు అని మొరటుగా అంటుంటాం. అదే మాటను స్టైలిష్‌గా ఫైట్ రూపంలో చూపించాం. దర్శకులు సన్నివేశాన్ని సృష్టించి ఇస్తే దాన్ని కొత్తగా చేసి చూపిస్తాం. ఒక్కో హీరోకు ఒక్కో స్టైల్‌ ఉంటుంది. మా హీరో కొత్తగా కొట్టాలనుకుంటూనే కంపోజ్‌ చేస్తాం.
- " class="align-text-top noRightClick twitterSection" data="">
ఆడంబరాలుండవు
ఇకపై ఫైట్స్‌లో ఆడంబరాలు ఉండకపోవచ్చు. వాటిని తగ్గించుకొని నిర్మాతలకు అనుగుణంగా ఫైట్స్‌ కంపోజ్‌ చేయాల్సి వస్తుంది. ఇంతకుముందు నిర్మాతకు ఒక లెక్క ఉండేది. కరోనా దెబ్బకు ఆ లెక్క తప్పడం వల్ల అందరూ బ్యాలెన్స్‌గా పనిచేయాల్సి ఉంటుంది. ఫైట్స్‌లోనూ బడ్జెట్‌ పరంగా మార్పులు కనిపిస్తాయి.
ఆ సినిమాలు అక్కడ ఆగాయి
చిరంజీవి 'ఆచార్య' సినిమా ప్రథమార్థంలో వచ్చే ఫైట్లన్నీ పూర్తి చేశాం. తర్వాత క్రిష్‌ దర్శకత్వంలో పవన్‌ కల్యాణ్‌ నటిస్తున్న సినిమాలో తొలి ఫైట్ పూర్తైంది. బోయపాటి - బాలకృష్ణ మూడో సినిమాలో ఫైట్ పూర్తి చేశాం. అది మీరు టీజర్‌లో చూశారు. రవితేజ 'క్రాక్‌' సినిమాలో అన్నీ పూర్తయ్యాయి. బెల్లంకొండ సాయిగణేశ్‌ సినిమాలో పరిచయం, క్లైమాక్స్‌ ఫైట్లు చేశాం. మరికొన్ని సినిమాలు చర్చల దశలో ఉన్నాయి. కన్నడలో కొన్ని సినిమాలు ఒప్పుకొన్నాం. తమిళంలో రజనీకాంత్‌ సినిమాకు పనిచేశాం. కరోనా వల్ల అజిత్‌ సినిమాకు చేయాల్సిన పని ఆగిపోయింది. అయితే మా ప్రాధాన్యం ఎక్కువ తెలుగు సినిమాలకే ఉంటుంది. ఆ తర్వాత ఇతర భాషా చిత్రాలకు వెళ్తాం.
ఆ కథే కారణం
చెన్నైలో ఫైటింగ్‌లు చేస్తూ ఉండగా హీరోలు కావాలని ఒక కథ సిద్ధం చేసుకున్నాం. అందులో హీరో ఎలా ఉండాలి. ఎలాంటి భావోద్వేగాలు పలికించాలనేది తెలుసుకున్నాం. ఆ శ్రమ వృథా పోలేదు. రామ్ లక్ష్మణ్ మాస్టర్లు కథలో భాగస్వాములవుతారని చాలా మంది దర్శకులు మెచ్చుకోడానికి ఆ కథే కారణం. నేర్చుకున్న ఏ విషయం వృథాగా పోదు.
