కరోనా దెబ్బకు థియేటర్లన్నీ మూతపడ్డాయి. వినోదమే కష్టమనే సమయంలో ప్రజలను అలరించేందుకు ఓటీటీ చక్కని వేదికైంది. ఇప్పటివరకు వెండితెర, బుల్లితెర మాత్రమే ఎందరినో స్టార్లను చేసింది. అయితే ఆ సత్తా తనకూ ఉందంటూ ఓటీటీ.. ఈ కరోనా కాలంలో కొందరిని ప్రజలకు చేరువ చేసింది. సామాన్య నటుల్ని కాస్త స్టార్లను చేసింది. అందుకే ఓటీటీ అంటే 'ఓవర్ ద టాప్' మాత్రమే కాదు.. టాలెంట్ను గుర్తించడంలోనూ టాపే అనేలా మారింది. ఓటీటీ వేదికల వల్ల ఈ ఏడాది తమ గ్రాఫ్ మార్చుకున్న కొందరి నటీనటుల గురించే ఈ కథనం.
ప్రతీక్ గాంధీ
గుజరాత్లో థియేటర్ ఆర్టిస్ట్గా పేరున్న ఇతడికి బాలీవుడ్లో అడుగుపెట్టాక పెద్దగా అవకాశాలు రాలేదు. 'లవ్యాత్రి', 'మిత్రోన్' లాంటి సినిమాల్లో చిన్న పాత్రల్లో చేసినా సరే గుర్తింపు లభించలేదు. పెద్దగా పేరు తెలియని ఇతడిని.. ఈ ఏడాది ఓటీటీని షేక్ చేసిన 'స్కామ్ 1992' ఒక్కసారిగా క్రేజ్ తీసుకొచ్చేసింది. వెండితెర ఇవ్వలేని పేరును ఓటీటీ ఒక్క సిరీస్తో అందించింది. ఇతడు ప్రతీక్ గాంధీయే అయినా నటించిన హర్షద్ మెహతా పాత్ర ఇతడికి అసలు పేరుగా మారిపోయింది.
ఐఎమ్డీబీ రేటింగ్లోనూ దుమ్ములేపిన ఈ సిరీస్.. స్టాక్ బ్రోకర్ హర్షద్ మెహతా జీవితం ఆధారంగా రూపొందించారు. ఇతడితో పాటు సతీష్ కౌశిక్, శ్రేయ ధన్వంతరి, నిఖిల్ ద్వివేది, అనంత్ నారాయణ్ మహదేవన్ అద్భుతంగా నటించారు. ప్రతీక్ పాత్ర మాత్రం సిరీస్ మొత్తానికే హైలెట్గా నిలిచింది.
అభిషేక్ బెనర్జీ
ఇతడిని అభిషేక్ బెనర్జీ అనే కంటే హథోడా త్యాగి అంటే అందరూ గుర్తుపడతారేమో. చాలా రోజులపాటు బాలీవుడ్లో చిన్న చిన్న పాత్రలు చేసినా పెద్దగా పేరు రాలేదు. ఆమిర్ ఖాన్ 'రంగ్ దే బసంతి' సినిమాతో అరంగేట్రం చేసిన ఇతడు.. ఆ తర్వాత పలు సినిమాల్లో క్యారెక్టర్ ఆర్టిస్ట్గా నటించాడు. స్త్రీ, డ్రీమ్గర్ల్, బాలా లాంటి సినిమాల్లోనూ మెరిశాడు. అయితే 'పాతాళ్ లోక్' వెబ్సిరీస్ ఇతడిని ఒక్కసారిగా గుర్తింపు తీసుకొచ్చింది. తనలోని నటనా స్థాయిని ప్రపంచానికి చాటి చెప్పింది.
దివ్వేందు శర్మ
అమెజాన్లోని 'మీర్జాపుర్' వెబ్సిరీస్ ఎంతగా హిట్టయిందో ప్రత్యేకంగా చెప్పక్కర్లేదు. వివిధ భాషల్లోని డబ్బింగ్లకూ సూపర్ క్రేజ్ వచ్చింది. అయితే ఈ సిరీస్లో ప్రతినాయక లక్షణాలున్న పాత్ర మున్నా భయ్యాగా కనిపించిన దివ్వేందు శర్మకు విపరీతమైన క్రేజ్ వచ్చింది. గతంలో ఎన్నో పాత్రలు చేశాడు. ఉద్యోగి నుంచి రొమాంటిక్ లవర్బాయ్గా అన్ని రోల్స్లోనూ అదరగొట్టాడు. అయితే అవన్నీ ఓవైపు మున్నా భయ్యా ఒక్కటే మరోవైపు అన్నంతగా ఆడియన్స్ మనసు దోచేశాడు. ఈ దెబ్బతో వరుస ఆఫర్లు క్యూ కడుతున్నాయి. త్వరలో 'బిచో కా ఖేల్' క్రైమ్ థ్రిల్లర్ సిరీస్లోనూ కనువిందు చేయనున్నాడు.
నమిత్ దాస్
స్మార్ట్తెరపై దుమ్ములేపిన మరో వెబ్ సిరీస్ 'ఆర్య'. తల్లిపాత్రలో కనిపించిన సుస్మితా సేన్, ఓ క్రైమ్ బాస్ మధ్య జరిగిన ఘర్షణను ఆసక్తికరంగా తెరకెక్కించారు. ఈ సస్పెన్స్ థ్రిల్లర్ నెటిజన్లను విశేషంగా ఆకట్టుకుంది. అయితే ఇందులో జవహర్ పాత్ర పోషించిన నమిత్ దాస్కూ మంచి పేరొచ్చింది. సుస్మితా పాత్ర తర్వాత ఇతడి రోల్కే ప్రేక్షకులు బాగా కనెక్ట్ అయ్యారు. చాలా సినిమాలు, షోలలో నమిత్ కనిపించినా.. ఈ ఏడాది మాత్రం అతడి దశ మారిపోయింది. తనలోని నటనకు కొత్త పుంతలు తొక్కించే అవకాశాన్ని కల్పించింది. 'ఆర్య', 'ఏ సూటబుల్ బాయ్', 'మాఫియా' విజయాలతో ఈ ఏడాది నమిత్ గ్రాఫ్ అమాంతం దూసుకెళ్లింది.
శ్వేతా త్రిపాఠి
'మీర్జాపుర్2'లో గోలూ పాత్రలో నటించిన శ్వేతా త్రిపాఠి.. ఈ ఏడాది ఓటీటీ తారల జాబితాలో చోటు దక్కించుకుంది. 'గోనే గేమ్', 'కార్గో అండే', నవాజుద్దీన్ సిద్ధిఖీ నటించిన 'రాత్ అఖేలీ హై'.. ఆమెకు మంచి పేరు తెచ్చాయి. వీటితో పాటు 'మసాన్', 'గోన్ కేశ్' సినిమాల్లోని ఆమె నటనకు అభిమానుల ఫిదా అయిపోయారు.
రసికా దుగ్గల్
అందాలు ఆరబోయడం వెండితెరపైనే కాదు.. ఓటీటీ వేదికలపైనా కొందరు నటీమణులు ప్రదర్శించారు. అయితే నటన, అభినయం, బోల్డ్ రోల్స్లో తనదైన మార్క్తో ఇమేజ్ను పెంచుకుంది రసికా దుగ్గల్. 'లూట్కేస్', 'ఏ సూటబుల్ బాయ్'కు ఆడియన్స్ నుంచి పాజిటివ్ స్పందన వస్తే.. మీర్జాపుర్ సిరీస్తో ఆమె నటనకు డై హార్డ్ ఫ్యాన్స్ అయిపోయారు.
పంకజ్ త్రిపాఠి
వెండితెర విలువలతో రూపొందినా.. ఓటీటీలోనే ప్రేక్షకుల ముందుకు వచ్చి ఘన విజయం సాధించింది 'గుంజన్ సక్సేనా' సినిమా. అయితే ఇది మిక్స్డ్ రివ్యూలు, కాంట్రవర్సీలకు కేరాఫ్ అడ్రస్ అయింది. ఇందులో పంకజ్ త్రిపాఠి నటనకు మాత్రం ఫుల్మార్కులే పడ్డాయి. తనదైన నటనతో ప్రేక్షకులను మంత్ర ముగ్ధులను చేశాడు. 'మీర్జాపుర్'లోనూ ఖలీన్ భయ్యాగా అద్భుతంగా చేశాడు. అంగ్రేజీ మీడియం, క్రిస్ హెమ్స్వోర్త్ 'ఎక్ష్ట్రాక్షన్' ఇతడి ఇమేజ్ను తారాస్థాయికి చేర్చాయి.
