'చావు కబురు చల్లగా' వినిపించేందుకు సిద్ధమయ్యాడు యువ కథానాయకుడు కార్తికేయ. ప్రముఖ నిర్మాత అల్లు అరవింద్‌ సమర్పణలో బన్నీవాసు నిర్మిస్తున్నాడు. కౌశిక్‌ పెగళ్లపాటి దర్శకుడు. తాజాగా చిత్రీకరణ ప్రారంభమైంది. ఈ సినిమాలో బస్తీ బాలరాజు పాత్రలో కనిపించనున్నాడు కార్తికేయ. ఇందుకు సంబంధించిన ఫస్ట్లుక్ విడుదల చేసింది చిత్ర బృందం. ట్రాఫిక్‌ జామ్‌లో చిక్కుకున్న ఓ వాహనంపై నిల్చుని సిగరెట్‌ తాగుతూ దర్శనమిచ్చాడీ యువహీరో. గళ్ల చొక్కా, లుంగీ ధరించి బస్తీ కుర్రాడి లుక్‌లో ఒదిగిపోయాడు.
రవితేజ వచ్చేస్తున్నాడు..
మరోవైపు మాస్ మహారాజ్ రవితేజ 'క్రాక్' సినిమా చిత్రీకరణ శరవేగంగా జరుగుతోంది. గోపీచంద్‌ మలినేని దర్శకుడు. కొన్ని వాస్తవ సంఘటనల ఆధారంగా రూపొందుతుందీ చిత్రం. ఇందులో రవితేజ పోలీసు అధికారి పాత్ర పోషిస్తున్నాడు. బి.మధు నిర్మిస్తున్న ఈ చిత్రంలో శృతి హాసన్‌ కథానాయిక. ఈ సినిమాకు సంబంధించి తాజాగా ఓ పోస్టర్‌ విడుదల చేసింది చిత్రబృందం. ఇందులో రవితేజ తుపాకి పట్టుకుని పరుగెత్తుతూ కనిపిస్తున్నాడు. అతడి ముఖం కనిపించకపోయినా ఆ కటౌట్‌కే అభిమానులు ఫిదా అవుతున్నారు. పవర్‌ఫుల్‌ లుక్‌లో వావ్ అనిపించాడు. మే 8న ప్రేక్షకుల ముందుకు రానున్న ఈ చిత్ర టీజర్‌ త్వరలోనే విడుదల చేయనుంది చిత్రబృందం.
ఇదీ చూడండి.. ప్రేమికుల రోజున 'ఏయ్ పిల్లా..' పాట విడుదల
