బాలీవుడ్ నటుడు సోనూసూద్(sonusood) మరోసారి తన మంచి మనసు చాటుకున్నారు. కరోనా ఫస్ట్వేవ్ ప్రారంభమైనప్పటి నుంచి బాధితులకు అండగా నిలిచిన ఆయన ఈ సారి వ్యాక్సినేషన్పై దృష్టి సారించారు. వ్యాక్సిన్ ప్రక్రియలో గ్రామీణ భారతానికి అండగా నిలిచేందుకు 'Coverg' పేరుతో ఓ కొత్త కార్యక్రమానికి శ్రీకారం చుట్టారు. టీకాల కోసం రిజిస్టర్ చేసుకోవడంలో ఇబ్బందులు పడుతున్న వారికి సాయం చేయడానికి వాలంటీర్లు స్వయంగా ముందుకొచ్చేలా దీన్ని రూపొందించారు.
"గ్రామీణ ప్రాంతాల్లో వ్యాక్సిన్ల సమస్యలను పరిష్కరించడానికి ఈ కోవర్గ్(Coverg) కార్యక్రమాన్ని ప్రారంభిస్తున్నాం. కేంద్ర ఆరోగ్య శాఖ దీన్ని ఆమోదించింది. ఇదొక అప్లికేషన్ సర్వీస్ ప్రొవైడర్. ఓ స్మార్ట్ ఫోన్, 4జీ నెట్వర్క్ ఉన్న ఎవరైనా https://www.covreg.in/లో రిజిస్టర్ చేసుకుని వాలంటీర్గా మారొచ్చు. టీకాల రిజిస్ట్రేషన్లో ఇబ్బంది పడుతున్న వారికి ఈ వాలంటీర్లు సాయం చేస్తారు. ఈ మహమ్మారిని అధిగమించాలంటే వ్యాక్సినేషన్, మన ముందున్న మార్గం."
-సోనూ సూద్, ప్రముఖ నటుడు.
వాలంటీర్లు ఏం చేస్తారంటే?
వాలంటీర్లు స్వయంగా ముందుకొచ్చి ఈ www.covreg.inలో తమ పేర్లను నమోదు చేసుకోవాలి. అనంతరం వ్యాక్సిన్పై ప్రజల్లో అవగాహన కల్పించడం, టీకాలకు సంబంధించిన అపోహలకు సమాధానామివ్వడం. వ్యాక్సినేషన్ రిజిస్ట్రేషన్, స్లాట్లు బుక్ చేయడం, పేర్లను నమోదు చేసుకున్న వారిని వ్యాక్సినేషన్ సెంటర్లకు తరలించడం సహా తదితర పనులు చేస్తారు.
ఇదీ చూడండి: నటుడు సోనూసూద్ కన్నీటి పర్యంతం
