సంక్రాంతికి 'అల వైకుంఠపురములో..' సినిమాతో హిట్‌ అందుకున్నాడు స్టైలిష్‌ స్టార్ అల్లు అర్జున్. ప్రస్తుతం సుకుమార్ దర్శకత్వంలో ఓ చిత్రంలో నటిస్తున్నాడు. కేరళలో ఈ సినిమా షూటింగ్‌ జరగబోతోంది. శేషాచలం అడవుల నేపథ్యంలో సాగే మాఫియా కథతో ఇది తెరకెక్కనున్నట్లు సమాచారం. ఇందులో బన్నీ లారీ డ్రైవర్‌గా కనిపించబోతున్నాడని టాక్. అయితే ఈ సినిమాలో అతడు కనిపించే లుక్పై ఆసక్తి నెలకొంది. ఈ నేపథ్యంలో తాజాగా స్టార్హీరో ఫొటోలు సామాజిక మాధ్యమాల్లో హల్చల్ చేస్తున్నాయి.
శనివారం తన బాడీగార్డు పుట్టినరోజు వేడుక నిర్వహించాడు బన్నీ. ఈ సందర్భంగా వేడుకలో తీసిన ఫొటోల్లో గుబురు గడ్డంతో కనివిందు చేశాడు బన్నీ. అయితే హెయిర్ స్టైల్ కనిపించకుండా క్యాప్తో కవర్ చేశాడు. ఈ లుక్ చూసిన నెటిజన్లంతా బన్నీ తన తర్వాత సినిమాలో ఇదే గెటప్లో కనిపిస్తాడని భావిస్తున్నారు.
'రంగస్థలం'లో చరణ్‌ కూడా ఇలాగే గుబురు గడ్డంతో సినిమా మొత్తం కనిపించడమే కాదు.. తన నటనతో మెస్మరైజ్‌ చేశాడు. సుక్కు మరోసారి ఆ సెంటిమెంట్‌ను ఫాలో అవుతున్నాడని టాలీవుడ్‌ టాక్.
మైత్రి మూవీ మేకర్స్‌ బ్యానర్‌ ఈ చిత్రాన్ని నిర్మించబోతోంది. రష్మిక కథానాయిక. దేవిశ్రీ ప్రసాద్‌ బాణీలు అందిస్తున్నాడు. సుకుమార్- బన్నీలది క్రేజీ కాంబినేషన్‌. వీరిద్దరూ కలిసి 'ఆర్య', 'ఆర్య 2' వంటి బ్లాక్‌బస్టర్‌ చిత్రాలను ప్రేక్షకులకు అందించారు. ఈ నేపథ్యంలో వీరి కాంబినేషన్‌లో రాబోతున్న మూడో సినిమాపై భారీ అంచనాలు నెలకొన్నాయి.
ఇదీ చూడండి : భార్యభర్తల్ని తల్లి కొడుకుల్ని చేసిన నెటిజన్
