బన్నీ సినిమా రిలీజ్ ఆపేందుకు రూ.8కోట్లు ఖర్చు చేశారా?

Ala vikunthapuramulo hindi dubbed movie: ఐకాన్స్టార్ అల్లుఅర్జున్ నటించిన ఓ సినిమా రిలీజ్ కాకుండా ఆపేందుకు ఓ చిత్రబృందం రూ.8కోట్లు ఖర్చు చేసిందట! ఇంతకీ ఆ మూవీ ఏంటి? అంత మొత్తంలో ఎవరు, ఎందుకు ఖర్చు చేశారో తెలుసుకుందాం..

అల వైకుంఠపురములో హిందీ డబ్

Published : Jan 13, 2022, 6:21 PM IST

Updated : Jan 13, 2022, 6:41 PM IST

Ala vikunthapuramulo hindi dubbed movie: ఐకాన్ స్టార్ అల్లుఅర్జున్కు ఉన్న ఇమేజ్ గురించి ప్రత్యేకంగా చెప్పనక్కర్లేదు. దక్షిణాదితో పాటు బాలీవుడ్లోనూ ఆయనకు మంచి క్రేజ్ ఉంది. అందుకే హిందీలో డబ్ అయ్యే ఆయన సినిమాలు కూడా యూట్యూబ్లో రికార్డ్ వ్యూస్తో దూసుకెళ్తుంటాయి. అయితే బన్నీ నటించిన ఓ మూవీ గురించి ఆసక్తికర విషయం బయటకొచ్చింది. ఆ సినిమా రిలీజ్ కాకుండా ఆపేందుకు ఓ చిత్రబృందం ఏకంగా రూ.8కోట్లు ఖర్చుచేసిందట! ఒకవేళ రిలీజ్ అయితే తమ సినిమాపై ప్రభావం పడుతుందని ఈ పని చేసినట్లు తెలిసింది. ఈ విషయాన్ని సినీవర్గానికి చెందిన ఓ ప్రతినిధి తెలిపారు. ఇంతకీ ఆ బన్నీ సినిమా ఏంటి? అది విడుదల కాకుండా ఆపేందుకు అంత మొత్తంలో ఖర్చు చేసింది ఎవరో తెలుసుకుందాం..

త్రివిక్రమ్ దర్శకత్వంలో అల్లుఅర్జున్ హీరోగా విడుదలైన 'అల వైకుంఠపురములో' ఎంతగా హిట్ అయిందో ప్రత్యేకంగా చెప్పనక్కర్లేదు. ఈ మూవీలో బన్నీ మేనరిజం, పాటలు సినీప్రియులను విపరీతంగా ఆకట్టుకున్నాయి. సాంగ్స్ విషయానికొస్తే యూట్యూబ్లో రికార్డ్లు సృష్టించాయి. దీంతో.. ఈ చిత్ర హిందీ డబ్బింగ్ రైట్స్ను గోల్డ్ మైన్స్ టెలిఫిల్మ్స్ అధినేత మనీష్ షా రూ.4కోట్లకు కొనుగోలు చేసినట్లు తెలిసింది.

ఈ నేపథ్యంలోనే రోహిత్ ధావన్ దర్శకత్వంలో కార్తిక్ ఆర్యన్, కృతిసనన్తో 'అల వైకుంఠపురములో' హిందీ రీమేక్ తెరకెక్కించనున్నట్లు అధికారికంగా ప్రకటించారు. 'షెహజాదా' అనే టైటిల్ను కూడా ఖరారు చేశారు.

" 'అల వైకుంఠపురములో' హిందీ డబ్ను టీవీ, డిజిటల్ ప్లాట్ఫామ్ వేదికగా గ్రాండ్గా రిలీజ్ చేద్దామని మనీష్ సన్నాహాలు చేశారు. అంతలోనే అదే సినిమా హిందీ రీమేక్ తెరకెక్కించనున్నట్లు తెలిసి కాస్త నిరాశకు గురయ్యారు. కానీ ఒప్పందం ప్రకారం తన సినిమా బయటకు వచ్చిన ఆరు నెలల తర్వాతే రీమేక్ను విడుదల చేయాలి. దీంతో ఆయన తన మూవీని త్వరగా ప్రేక్షకుల ముందుకు తెచ్చేందుకు సన్నాహాలు ప్రారంభించారు. ఈ విషయం తెలుసుకున్న 'షెహజాదా' చిత్రబృందం.. తమ రీమేక్ కన్నా డబ్బింగ్ ముందు వస్తే తమపై ప్రభావం పడే అవకాశం ఉందని గ్రహించి మనీష్తో సంప్రదింపులు జరపడం ప్రారంభించింది. కో ప్రొడ్యూసర్గా వ్యవహరించే ఆఫర్ను కూడా ప్రకటించింది. కానీ మనీష్ దాన్ని సున్నితంగా తిరస్కరించారు. ఆ తర్వాత పలు దఫాల చర్చల ద్వారా చివరికి రీమేక్ను ముందు విడుదల చేసేలా మనీష్తో రూ.8కోట్లకు డీల్ కుదుర్చుకుంది. తమ చిత్రం థియేటర్లలో వచ్చిన 16వారాల తర్వాతే డబ్బింగ్ను స్ట్రీమింగ్ చేయాలని ఒప్పందం కుదుర్చుకుంది. దీంతో మనీష్కు రూ.4కోట్ల లాభం వచ్చింది." అని సదరు ప్రతినిధి తెలిపారు.

కాగా, అల్లుఅర్జున్ ఇటీవలే సుకుమార్ దర్శకత్వంలో 'పుష్ప' సినిమాతో ప్రేక్షకుల ముందుకు వచ్చి ఘనవిజయాన్ని అందుకున్నారు. బాలీవుడ్లోనూ ఈ చిత్రం సూపర్హిట్గా నిలిచింది.