బాలీవుడ్‌ నటుడు అక్షయ్ కుమార్, తమిళ నటుడు ధనుష్‌లతో ఓ క్రేజీ ప్రాజెక్టు రూపొందుతోంది. వీరిద్దరితో ప్రముఖ బాలీవుడ్‌ దర్శకుడు ఆనంద్ ఎల్. రాయ్ తెరకెక్కిస్తున్న చిత్రం 'అత్రాంగి రే'. సారా అలీఖాన్ కథానాయిక. ఇప్పటికే మొదలైన ఈ ప్రాజెక్టు... తొలి షెడ్యూల్ పూర్తి చేసుకుంది. అయితే కరోనా వల్ల చిత్రీకరణ తాత్కాలికంగా వాయిదా పడింది.
ప్రస్తుతం మళ్లీ షూటింగ్లు పునఃప్రారంభం అవుతున్న వేళ మళ్లీ పట్టాలెక్కనుందీ సినిమా. కొత్త షెడ్యూల్ మధురై, దిల్లీ, ముంబయిలో ఉంటుందని సమాచారం.
"లాక్డౌన్ సమయంలో చాలా శ్రమించి 'అత్రాంగి రే' షెడ్యూల్ రూపొందించాం. తర్వాతి షెడ్యూల్ ప్రారంభించేందుకు చాలా ఆతృతగా ఎదురుచూస్తున్నాం. అక్టోబర్ నుంచి మధురైలో చిత్రీకరణ ప్రారంభిస్తాం. అక్షయ్తో దిల్లీ, ముంబయిలో మరో నెల షూటింగ్ ఉంటుంది. కచ్చితంగా కరోనా భద్రతా ప్రమాణాలు పాటిస్తాం" అని రాయ్ తెలిపారు.
2013లో ఆనంద్, ధనుష్ కాంబినేషన్లో రంజానా చిత్రం తెరకెక్కింది. మళ్లీ ఇన్నేళ్లకు మరో సినిమా రానుంది. వారణాసి షెడ్యూల్లో ఇప్పటికే సారా, ధనుష్లపై కొన్ని సీన్లు పూర్తి చేసినట్లు వెల్లడించారు ఆనంద్.
జాతీయ అవార్డు గ్రహీత హిమాన్షు శర్మ కథ అందిస్తుండగా, ఎ.ఆర్‌. రెహమాన్‌ సంగీత స్వరాలు సమకూరుస్తున్నారు. భూషణ్‌ కుమార్ నిర్మిస్తున్న ఈ చిత్రం... 2021 ఫిబ్రవరిలో ప్రేక్షకుల ముందుకు రానుంది.
