ఇంటర్నెట్లో ఉండాల్సిన పోర్న్స్టార్స్.. పశ్చిమ బంగాల్లోని ఇంటర్ కాలేజీల మెరిట్ జాబితాల్లో దర్శనమిస్తున్నారు. ఈ విషయమై పోలీసులకు ఫిర్యాదు చేయగా, వారు దర్యాప్తు చేస్తున్నారని సదరు కళాశాల యాజమాన్యాలు తెలిపాయి.
కాలేజీ టాపర్ సన్నీ లియోనీ
కోల్కతాలోని అషుతోష్ కళాశాల, తమకు సంబంధించిన 12వ తరగతి మెరిట్ జాబితాను శుక్రవారం విడుదల చేసింది. అగ్రస్థానాన్ని నటి సన్నీ లియోనీ కైవసం చేసుకున్నట్లు కనిపించింది. పేరుతో పాటు రోల్ నంబర్, మార్కులు కూడా ఉండటం వల్ల నెటిజన్లు దీనిని బాగా ట్రోల్ చేస్తున్నారు. దీని గురించి ట్వీట్ చేసిన సన్నీ.. వచ్చే సెమిస్టర్ నుంచి క్లాస్లకు కూడా వస్తానని కామెంట్ చేసింది. దీనితో పాటే బడ్జ్ బడ్జ్ కాలేజీ మెరిట్ జాబితాలోనూ సన్నీ పేరు కనిపించడం వల్ల అందరూ ఆశ్చర్యపోయారు.
టాప్-4లో ప్రముఖ పోర్న్స్టార్స్
పశ్చిమ బంగాల్లోని బర్సాత్ ప్రభుత్వ కళాశాలలో అయితే ఏకంగా నలుగురు ప్రముఖ పోర్న్స్టార్స్, టాప్-4 ర్యాంక్ల్లో ఉండటం యాజమాన్యాన్ని అవాక్కయ్యేలా చేసింది. ఈ జాబితాలో డేనీ డేనియల్స్, మియా ఖలీఫా, సన్నీ లియోనీ, జానీ సిన్స్ వరుస స్థానాల్లో ఉన్నారు.
ఈ మూడు కాలేజీ మేనేజ్మెంట్స్ కూడా ఈ విషయమై ఫిర్యాదు చేయగా, పోలీసులు దర్యాప్తు చేస్తున్నారు. కొందరు వ్యక్తులు కావాలనే తమ కళాశాల పేరు చెడగొట్టేందుకు ఇలా చేస్తున్నారని బర్సాత్ కాలేజీ విద్యార్థి కౌశిక్ కర్మాకర్ చెప్పారు.
