'పీకే'లో ఆ పాత్ర పండటానికి పదివేల కిళ్లీలు!

ఏదైనా ఛాలెంజింగ్​ పాత్ర దొరికితే చాలు.. అందులో పరకాయ ప్రవేశం చేయడానికి కథానాయకులు ప్రయత్నిస్తారు. అందులో బాలీవుడ్​ హీరో ఆమిర్​ఖాన్​ ముందు వరుసలో ఉంటారు. 'దంగల్​' చిత్రం కోసం బరువు పెరిగి మళ్లీ తగ్గారు. అదే విధంగా ఆయన నటించిన 'పీకే' సినిమా కోసం దాదాపుగా 10 వేల కిళ్లీలను ఆమిర్​ నమిలారట.

బాలీవుడ్​ స్టార్​ హీరో ఆమిర్​ ఖాన్​ కెరీర్​లో సూపర్​డూపర్ హిట్​గా నిలిచిన చిత్రం 'పీకే'. విభిన్న కథాంశంతో రూపొందిన చిత్రం.. ప్రేక్షకులను అమితంగా ఆకట్టుకుని బాక్సాఫీసు వద్ద కలెక్షన్ల వర్షం కురిపించింది. ఇందులో గ్రహాంతరవాసి పాత్రలో కనిపించిన ఆమిర్​.. ఎక్కువగా కిళ్లీలు నములుతూ చాలా సన్నివేశాల్లో కనిపించాడు. అయితే నిజజీవితంలో ఆమిర్​కు కిళ్లీ అలవాటు లేదట.

అయితే 'పీకే' సినిమా కోసం ఒకటి కాదు, రెండు కాదు.. ఏకంగా 10 వేల కిళ్లీలను ఆమిర్ వేసుకున్నారట. "ఒకోసారి రోజుకు 100 కిళ్లీలు వేసుకోవాల్సి వచ్చేది. కావాల్సినప్పుడల్లా కిళ్లీలు కట్టడానికి ప్రత్యేకంగా ఓ మనిషిని, పూర్తి సరంజామాతో సెట్​లోనే ఉంచుకున్నాం" అని ఆమిర్​ ఖాన్​ ఓ సందర్భంలో వెల్లడించారు. దాదాపుగా ప్రతి టేక్​కు ఒక్కో కిళ్లీ వేసుకునేవారట. షూటింగ్​ మొదలయ్యేలోగా నోరు, పెదాల రంగు తగినంత ఎర్రగా ఉండటానికి పది పదిహేను పాన్​లను నమిలేవారట.