ప్రపంచవ్యాప్తంగా అత్యధిక మంది వాడే సోషల్ మీడియా ప్లాట్ఫామ్లలో వాట్సాప్ ఒకటి. దాదాపు ప్రతి ఒక్కరి స్మార్ట్ఫోన్లో ఈ యాప్ కచ్చితంగా ఉంటుంది! 2009లో ప్రారంభమైన ఈ ఆన్లైన్ ఇన్స్టంట్ మెసేజింగ్ యాప్.. అనతి కాలంలోనే విశేష ఆదరణ పొందింది. తర్వాత ఈ యాప్ను ఫేస్బుక్ వ్యవస్థాపకుడు మార్క్ జుకర్బర్గ్ కొనుగోలు చేశారు.
అయితే వాట్సాప్ తమ యూజర్ల కోసం ఎప్పటికప్పుడు కొత్త కొత్త ఫీచర్లను అందుబాటులోకి తీసుకొస్తుంటుంది. మొదటగా వాట్సాప్ ప్రవేశపెట్టిన స్టేటస్ అనే ఫీచర్ బాగా ప్రాచుర్యం పొందింది. తర్వాత వివిధ సంస్థలు సైతం ఆ దిశగా అడుగులు వేశాయి. ఇన్స్టాగ్రామ్.. స్టేటస్ ఫీచర్ను స్టోరీ రూపంలో వాడుతోంది. ఆయా న్యూస్ వెబ్సైట్లు వెబ్ స్టోరీస్గా ఉపయోగించుకుంటున్నాయి.
ఇటీవలే వాట్సాప్.. డిలీట్, అండూ, బహుళ ఫోన్లలో ఒకే అకౌంట్ వినియోగం వంటి ఫీచర్లను తీసుకువచ్చింది. తాజాగా మరో కొత్త ఫీచర్ను ప్రవేశపెట్టింది. వినియోగదారులు తమ చాట్స్ విషయాల్లో భద్రత కల్పించడానికి, కొన్ని పర్సనల్ చాట్స్ను దాచి పెట్టుకునేందుకు లాక్ సిస్టమ్ను తెచ్చింది. ఇప్పటి దాకా వాట్సాప్ మొత్తానికి కలిపి లాక్ సిస్టమ్ ఉండేది. అయితే కొత్తగా తీసుకువచ్చిన ఫీచర్ వల్ల.. మనకు కావాల్సిన చాట్కు మాత్రమే లాక్ వేసుకునే సౌకర్యం తెచ్చింది.
అయితే WaBeta ఇన్ఫో ప్రకారం.. బీటా యూజర్లకు మాత్రమే ప్రస్తుతం ఈ ఫీచర్ అందుబాటులో ఉంది. వారు ఈ కొత్త ఫీచర్ను చక్కగా ఉపయోగించుకోవచ్చు. ప్రస్తుతం టెస్టింగ్ దశలో ఉన్న ఈ ఫీచర్ విజయవంతమైతే.. అందరికీ అందుబాటులోకి రానుంది.
చాట్ లాక్ను ఎలా ఎనేబుల్ చెయ్యాలి?
ముందుగా బీటా యూజర్లు వాట్సాప్ను అప్డేట్ చేసుకోవాలి. లాక్ చేయాలనుకున్న వారి అకౌంట్ ఓపెన్ చేసి ప్రొఫైల్ సెక్షన్లోకి వెళ్లాలి. స్క్రోల్ చేస్తే అక్కడ 'చాట్ లాక్' అనే ఆప్షన్ కనిపిస్తుంది. దాని మీద క్లిక్ చేస్తే 'లాక్ దిస్ చాట్ విత్ ఫింగర్ ప్రింట్' అని వస్తుంది. దాన్ని ఎనేబుల్ చేసుకోవాలి.
బీటా వెర్షన్ను ఎలా పొందాలి?
బీటా వెర్షన్ కావాలనుకునే వినియోగదారులు.. ముందుగా వారి ఫోన్లలో గూగుల్ ప్లే స్టోర్ లేదా యాపిల్ స్టోర్ను ఓపెన్ చెయ్యాలి. తర్వాత వాట్సాప్ అని టైప్ చేయాలి. అనంతరం దానిపై క్లిక్ చేసి కిందకు స్క్రోల్ చేస్తే డెవలపర్ సమాచారం వస్తుంది. అక్కడ బీటా ప్రోగ్రాం అనే ఆప్షన్ ఉంటుంది. అది ఫుల్ అని చూపిస్తే మీరు బీటా వెర్షన్ను ఉపయోగించలేరు. సాధారణంగా ఇది ఎప్పటికీ ఫుల్ గానే ఉంటుంది. అందువల్ల కొత్త వాళ్లు ఆ సౌకర్యాన్ని సులువుగా పొందలేరు!
