Latest WhatsApp Feature : మెటా నేతృత్వంలోని వాట్సాప్ మరో నయా ఫీచర్ను తీసుకొచ్చింది. దీనితో వాట్సాప్ వినియోగదారులు ఇకపై తమ మెసేజ్లను షార్ట్ వీడియో రూపంలో కూడా పంపించడానికి వీలవుతుంది. ఇప్పటి వరకు కేవలం టెక్ట్స్ రూపంలో మాత్రమే సందేశాలు పంపించే వీలు ఉండగా.. ఇకపై 60 సెకెన్ల నిడివితో షార్ట్ వీడియో రూపంలోనూ మెసేజ్లు పంపించేందుకు అవకాశం ఉంటుంది.
ఈ షార్ట్ వీడియో మెసేజ్ ఫెసిలిటీ ఇప్పటికే ఆండ్రాయిడ్, ఐఓఎస్ వినియోగదారులకు అందుబాటులోకి వచ్చింది. మెటా సీఈఓ మార్క్ జుకర్బర్గ్ తన ఫేస్బుక్ పోస్టులో ఈ వాట్సాప్ అప్డేట్ గురించి వెల్లడించారు. ప్రపంచవ్యాప్తంగా ఉన్న వాట్సాప్ యూజర్లు అందరికీ దీనిని క్రమంగా అందుబాటులోకి తేనున్నట్లు ఆయన స్పష్టం చేశారు.
60 సెకెన్ల నిడివితో వీడియో మెసేజ్
WhatsApp video message feature : తాజాగా తీసుకొచ్చిన ఈ షార్ట్ వీడియో ఫీచర్.. రియల్టైమ్ వాయిస్ మెసేజ్ ఫీచర్లానే పనిచేస్తుంది. టెక్ట్స్ బాక్స్ పక్కనే వీడియో రికార్డింగ్ ఐకాన్ ఉంటుంది. దీనిని ఉపయోగించి 60 సెకెన్ల నిడివితో వీడియో మెసేజ్ను రికార్డ్ చేసి, తరువాత వాటిని మెసేజ్ రూపంలో ఇతరులకు పంపించవచ్చు.
వాట్సాప్ ఈ లేటెస్ట్ అప్డేట్ గురించి తన అధికారిక బ్లాగ్ పోస్ట్లోనూ వివరించింది. ఈ నయా ఫీచర్ సాయంతో యూజర్లు పుట్టినరోజు శుభాకాంక్షలు చెప్పవచ్చు. మంచి న్యూస్ను షేర్ చేయవచ్చు. అలాగే అత్యంత ముఖ్యమైన సమాచారాన్ని తమ బంధువులు, స్నేహితులకు చేరవేయవచ్చు అని పేర్కొంది. మరీ ముఖ్యంగా ఈ మెసేజ్లు ఎండ్-టు-ఎండ్ ఎన్క్రిప్షన్తో ఉంటాయి కనుక భద్రతా పరంగా ఎలాంటి ఇబ్బందులు తలెత్తవు అని వాట్సాప్ చెబుతోంది. వాట్సాప్ యూజర్లు ఈ షార్ట్ వీడియో మెసేజ్ ఫీచర్ను ఉపయోగించుకోవాలంటే.. వెంటనే యాప్ను అప్డేట్ చేసుకోవాల్సి ఉంటుంది. ఇందుకోసం గూగుల్ ప్లేస్టోర్ లేదా యాపిల్ స్టోర్లోకి వెళ్లి వాట్సాప్ను అప్డేట్ చేసుకోవాలి.
ఆకర్షణీయమైన సెర్చ్ బార్
WhatsApp new search bar feature : వాట్సాప్ తన వినియోగదారుల కోసం లేటెస్ట్గా ఆకర్షణీయమైన సెర్చ్ బార్ ఫీచర్ను తీసుకొచ్చింది. అయితే ప్రస్తుతం ఇది కేవలం ఆండ్రాయిడ్ బీటా వెర్షన్ యూజర్లకు మాత్రమే అందుబాటులో ఉంది. ఈ అప్డేట్లో ఉన్న మరో ముఖ్యమైన విషయం ఏమిటంటే.. యాప్ తెరవగానే అన్రెడ్ మెసేజ్లు, ఫొటోలు, వీడియోలు, లింక్ ఆప్షన్లు కొత్తగా తెలుపు రంగులో కనిపిస్తున్నాయి. ఇది యాప్ విజువలైజేషన్ను మరింతగా మెరుగుపరుస్తుందని బీటా టెస్టర్లు చెబుతున్నారు.
గ్రూప్ క్రియేషన్ ఈజీ
WhatsApp group create : వాట్సాప్ వినియోగదారులు మరింత సులువుగా గ్రూప్లను క్రియేట్ చేసుకునే విధంగా సరికొత్త అప్డేట్ వచ్చింది. మెసేజ్ ఫార్వార్డ్ చేసే సమయంలో క్రియేట్ గ్రూప్ అనే గుర్తును యూజర్లకు చూపిస్తుంది. దీని ద్వారా చాలా సులువుగా యూజర్లు కొత్త గ్రూప్ను క్రియేట్ చేసుకోవడానికి వీలవుతుంది. దీనిలోకి మీ స్నేహితులను కూడా చాలా సులువుగా యాడ్ చేసుకోవచ్చు.
