కరోనా వ్యాప్తి నేపథ్యంలో సిబ్బంది ఒకేచోట కలిసి పనిచేసే అవకాశాలు తగ్గిపోయాయి. సంస్థలన్నీ రిమోట్ పద్ధతిలోనే పని కల్పిస్తున్నాయి. అయితే అందరూ అంతర్జాల వాడకంపై దృష్టి సారించడం వల్ల.. ఆయా సంస్థలు, కంపెనీలు కొత్త చిక్కుల్ని ఎదుర్కొంటున్నాయి. సైబర్ కేటుగాళ్లు.. ప్రైవసీని బ్రేక్ చేయడం, డేటాను తస్కరించడం, రాన్సమ్వేర్లను పంపించి సిస్టమ్ను తమ ఆధీనంలోకి తెచ్చుకోవడం వంటి పనులు చేస్తున్నారు.
సైబర్ దాడుల్లోని రకాలు, వాటి నుంచి రక్షించుకునే మార్గాల విషయంలో సైబర్ సెక్యూరిటీ నిపుణులు ఇంద్రజిత్ సింగ్ కొన్ని సూచనలు చేస్తున్నారు. వాటి గురించి ఓసారి తెలుసుకుందాం.
రిమోట్ వర్కింగ్కు మారిన సంస్థలు...
కొవిడ్-19 దెబ్బకు వ్యాపార కార్యకలాపాలన్నీ కార్యాలయాల నుంచి కాకుండా ఇళ్ల వద్ద నుంచే జరుగుతున్నాయి. అయితే అత్యవసర పరిస్థితుల్లో రిమోట్ వర్కింగ్కు కొన్ని సంస్థలు మొగ్గు చూపినా.. ఈ తరహా విధానంతో చాలా చిక్కులు ఎదుర్కొంటున్నాయి. సిబ్బంది అటెండెన్స్ నుంచి కార్పొరేట్ డేటా లీక్, డేటా ప్రొటక్షన్ వంటి విషయాల్లో కొన్ని లోటుపాట్లు ఉండటమే ఇందుకు కారణం.
సైబర్ దాడులు పెరిగాయి...
కరోనా మహమ్మారి ఓ వైపు ఇబ్బందులు పెడుతుంటే.. మరోవైపు సైబర్ దాడుల సంఖ్య గణనీయంగా పెరిగింది. వైరస్ పరిస్థితులను ఆసరాగా తీసుకున్న హ్యాకర్లు.. దాడులకు పాల్పడుతున్నారు. ముఖ్యంగా వైద్యరంగానికి ప్రాముఖ్యం పెరగ్గా... ఐటీ సర్వీసులపై ఆధారపడటం మరింత విస్తృతమైంది. అయితే ఇదే సమయంలో వైద్య రంగంపై సైబర్ దాడులు పెరిగాయి. దీనికి కారణం చాలా ఫార్మా సంస్థలు కరోనా వ్యాక్సిన్ కనిపెట్టే పనిలో ఉండటమే. హ్యాకర్లు, కొంతమంది కేటుగాళ్లు వ్యాక్సిన్ సమాచారం తస్కరించాలని ప్రయత్నిస్తున్నారు. ఇందుకోసం ఫిషింగ్ ఎటాక్లు సహా మాల్వేర్, ర్యాన్సమ్వేర్లతో దాడులు చేస్తున్నారు. హెల్త్కేర్, ఫార్మా మ్యానుఫ్యాక్చరింగ్లో డేటాను కాపాడుకోవడం, సైబర్ దాడుల నుంచి రక్షించుకోవడం కీలకంగా మారింది.
బ్యాంకింగ్ రంగంలోనూ...
సైబర్ దాడులకు పాల్పడే అవకాశమున్న మరో సెక్టార్ బ్యాంకింగ్. ఈ విపత్తు సమయంలో బ్యాంకింగ్ రంగంలోనూ సైబర్ దాడులు పెరిగాయి. మాల్వేర్ సాయంతో ఆర్థిక సంస్థలను టార్గెట్ చేస్తారు. వాటిని తమ పరిధిలోకి తెచ్చుకోవాలని ప్రయత్నిస్తారు. ఒక్కో దేశంలో ఒక్కో పద్ధతి అమలు చేస్తుంటారు. ప్రతి ఒక్కరు శారీరకంగా, మానసికంగా ఇబ్బందులు ఎదుర్కోవడాన్ని తమకు అనుకూలంగా మార్చుకోవాలని తెరవెనుక నుంచి ప్రయత్నాలు చేస్తారు కేటుగాళ్లు.
అత్యవసర సేవల్లోనూ...
పవర్ గ్రిడ్, వాటర్ ప్లాంట్లు, ఆయిల్ అండ్ గ్లాస్ ప్లాంట్లు, టెలికాం నెట్వర్క్ల వంటి అత్యవసర సేవలపైనా సైబర్ నేరగాళ్ల కన్ను పడింది. అందుకే ఆయా విభాగాల్లోనూ సైబర్ సెక్యూరిటీకి ప్రాధాన్యం ఏర్పడింది. కరోనా మహమ్మారి సమయంలో చాలా మంది సిబ్బంది అత్యవసర సేవల విషయంలో అన్ని వేళలా పర్యవేక్షణ ఉంచలేకపోతున్నారు. ఎక్కువ మంది ఉద్యోగులు వర్క్ఫ్రమ్ హోం చేయడాన్ని ఆసరగా తీసుకుని హ్యాకర్లు దాడికి పాల్పడుతున్నారు.
ఫిషింగ్ ఈ-మెయిల్ అంటే?
హ్యాకర్లు మాల్వేర్లను పంపేందుకు ఎక్కువగా వినియోగిస్తున్న పద్ధతుల్లో ఫిషింగ్ ఈ-మెయిల్ ఒకటి. మెయిళ్లకు వైరస్తో కూడిన సందేశాలు పంపి.. వాటి ఉచ్చులో పడేసే ప్రయత్నాలు చేస్తారు. గత కొన్ని నెలల వ్యవధిలోనే 600 శాతం ఇటువంటి కేసులు పెరిగినట్లు తెలుస్తోంది. ప్రపంచమంతా కరోనా భయంలో కొట్టుమిట్టాడుతుంటే.. ఈ సమయంలో సైబర్ నేరగాళ్లు మాత్రం ప్రభుత్వ ఏజెన్సీలు, శాఖలు పంపినట్టుగా ఇలాంటి ఫిషింగ్ మెయిల్స్‌ను పంపిస్తూ.. అమాయకుల వ్యక్తిగత, ఆర్థిక సమాచారాన్ని తస్కరించేందుకు ప్రయత్నిస్తున్నారు.
డబ్లూహెచ్ఓ పంపినట్లు కరోనా సమయంలో చేయాల్సినవి, చేయకూడనివి అంటూ సమాచారం పంపుతున్నారు. ఒక్కసారి వారు పంపిన ఫైల్ను డౌన్లోడ్ చేసి ఓపెన్ చేస్తే.. అప్పుడు సమస్య మొదలవుతుంది. ఎవరైనా ఆ లింక్లు లేదా ఎటాచ్మెంట్లపై క్లిక్ చేస్తే... అది ఆటోమేటిక్గా ఆయా ల్యాప్టాప్ లేదా పీసీలో చేరి వ్యక్తిగత, సున్నితమైన సమచారం సేకరిస్తుంది. ఫిబ్రవరి-మార్చి సమయంలో దాదాపు 20 లక్షల ఈ మెయిల్ ఖాతాలకు ఇలాంటి హానికరమైన మెయిల్స్‌ వెళ్లినట్టు సమాచారం.
నకిలీ ఈ- మెయిల్స్‌ మిమ్మల్ని నకిలీ వెబ్‌సైట్ల వైపు తీసుకెళ్తాయి. దిల్లీ, ముంబయి, హైదరాబాద్‌, చెన్నై, అహ్మదాబాద్‌ వంటి నగరాల్లో ప్రజలందరికీ ఉచితంగా కరోనా పరీక్షలు నిర్వహిస్తాం అంటూ ఈ-మెయిల్స్‌ వస్తున్నాయని.. వాటికి స్పందించవద్దని ద ఇండియన్‌ కంప్యూటర్‌ ఎమర్జెన్సీ రెస్పాన్స్‌ టీం ప్రజలను అప్రమత్తం చేసింది.
