ఒకప్పుడు స్మార్ట్ఫోన్ల ధరలు ఎక్కువ ఉండేవి. ఫీచర్లు మాత్రం చాలా తక్కువగా ఉండేవి. ఇప్పుడు పరిస్థితి మారిపోయింది. ఫీచర్లు బాగా పెరగటం సహా.. ధర తగ్గటం మొదలైంది. బడ్జెట్ ధరలో మంచి ఫీచర్లతో అనేక మోడళ్లు అందుబాటులోకి వచ్చాయి. రోజు రోజుకు సరికొత్త మోడళ్లు మార్కెట్లోకి వస్తున్న నేపథ్యంలో కొనుగోలు చేసే సమయంలో కెమెరా, ఫోన్ సైజు లాంటి వాటితో పాటు ర్యామ్, ప్రాసెసర్, ఇంటర్నల్ మెమోరీ వంటి వాటి గురించి తెలుసుకోవటం సర్వ సాధారణమైంది. మరి ఇంతకీ ఫోన్లో ర్యామ్, ప్రాసెసర్ల పాత్ర ఏమిటి? వాటిని ఎందుకు అంత కీలకంగా పరిగణిస్తుంటారు?
ఫోన్లో ర్యామ్, ప్రాసెసర్, ఇంటర్నల్ మెమోరీ అనేవి చాలా కీలకమైనవి. ఇవి మొత్తంగా ఫోన్ పనితీరును ప్రభావితం చేస్తుంటాయి. మంచి ప్రాసెసర్, సరిపడా ర్యామ్, ఇంటర్నల్ మెమోరీ ఉన్నట్లయితే ఫోన్ పనితీరు మెరుగవుతుంది.
ర్యామ్
ర్యామ్ అంటే ర్యాండమ్ యాక్సెస్ మెమోరీ. ఇది కూడా ఒక రకమైన మెమోరీనే. యాప్లు సరిగ్గా పనిచేయటం సహా మల్టీ టాస్కింగ్కు ఇది కీలకం. యాప్లు నడిచే సమయంలో తాత్కాలిక ఫైల్స్ అన్ని ఈ మెమోరీలోనే ఉంటాయి. ర్యామ్లో డేటాను యాప్లు వేగంగా ఉపయోగించుకుంటాయి.
మల్టీ టాస్కింగ్ అంటే ఒకేసారి ఒకటి కంటే ఎక్కువ యాప్లు ఉపయోగించుకోవటం. ఒక్కో యాప్ రన్నింగ్లో ఉన్నప్పుడు కొంత ర్యామ్ను వాడుకుంటుంది. ర్యామ్ తక్కువున్నట్లయితే ఎక్కువ యాప్లు ఉపయోగిస్తున్న సమయంలో అన్నింటి కంటే ముందున్న యాప్ క్లోజ్ అయిపోతుంది. దీని వల్ల మల్టీ టాస్కింగ్ కష్టం అవుతుంది.
కొన్ని యాప్లకు ఎక్కువ ర్యామ్ అవసరం ఉంటుంది. గేమ్స్ లాంటి వాటికైతే మరీ ఎక్కువ ర్యామ్ అవసరం ఉంటుంది. కాబట్టి ఎక్కువ ర్యామ్ ఉన్న ఫోన్ల మంచి ప్రదర్శన కనబరుస్తాయి. మల్టీ టాస్కింగ్ కూడా చేస్కోవచ్చు.
ఓఎస్, సిస్టమ్లో ఉన్న ఇన్బిల్ట్ యాప్లు నడిచేందుకు కూడా ర్యామ్ కావాలి. అందుకే కొంత ర్యామ్ ఎప్పుడూ ఉపయోగంలోనే ఉంటుంది. ఫోన్ షట్డౌన్ చేయగానే ఇందులోని మెమోరీ డిలీట్ అయిపోతుంది. అంతేకాకుండా ర్యామ్లో కొంత మొత్తాన్ని ఓఎస్ ఉపయోగించుకుంటుంది.
ప్రాసెసర్
ప్రాసెసర్, ర్యామ్, మెమోరీని కలిపి మానవుని మెదడుతో పోల్చవచ్చు. అన్నింటికంటే ఫోన్లో ప్రాసెసర్ అనేది చాలా ముఖ్యమైనది. ఇది ఫోన్ స్పీడ్కు సంబంధించినది. ఎంత వేగంగా ఒక యాప్ ఓపెన్ అవుతుంది, ఎంత త్వరగా ఒక ప్రక్రియ పూర్తవుతుందన్నది ప్రాసెసర్ మీద ఆధారపడి ఉంటుంది. ప్రాసెసర్ వేగాన్ని గిగాహెర్ట్జ్లలో కొలుస్తారు. ఇది ఎక్కువగా ఉన్న ఫోన్లలో మంచి ప్రదర్శన ఉంటుంది.
గిగాహెర్ట్జ్ ఎక్కువగా ఉన్న ప్రాసెసర్లతో పాటు వాటిలోని కోర్ల సంఖ్య కూడా చాలా ముఖ్యమైనది. కోర్ అంటే ఒక ప్రాసెసర్ అనుకోవచ్చు. ఒక్కో ప్రాసెసర్పైన ఇంకో ప్రాసెసర్ అమర్చటమే కోర్ వ్యవస్థ. ఒక్క ప్రక్రియ ప్రాసెసర్కు అందినప్పుడు.. అది మల్టీపుల్ కోర్ల మధ్య విభజన జరిగిన త్వరగా పూర్తవుతుంది. దీనివల్ల ప్రాసెసింగ్ వేగం పెరుగుతుంది.
ఉదాహరణకు 4 కోర్ ప్రాసెసర్ అంటే.. ఒక ప్రాసెసర్లోనే నాలుగు లేయర్ల ప్రాసెసర్లు ఉంటాయన్నట్లు. 3 గిగాహెర్ట్జ్ సింగిల్ కోర్ ప్రాసెసర్ కంటే 3 కోర్ డ్యూయల్ కోర్ ప్రాసెసర్ వేగం ఎక్కువగా ఉంటుంది.
ఎక్కువ కోర్లతో ఎక్కువ స్పీడ్ ఉన్న ప్రాసెసర్ను ఎంచుకోవటం వల్ల ఫోన్ ఉపయోగిస్తున్నప్పుడు మంచి అనుభూతి పొందవచ్చు. కొన్ని యాప్లకు ఎక్కువ వేగం ఉన్న ప్రాసెసర్ అవసరం ఉంటుందనేది కూడా గుర్తుంచుకోవాలి.
సాధారణంగా ఇప్పుడు మార్కెట్లో ఉన్న ఫోన్లలో సింగిల్ కోర్ ప్రాసెసర్లు అసలు లేవు. స్మార్ట్ఫోన్ల విషయంలో ప్రధానంగా స్నాప్ డ్రాగన్, మీడియా టెక్లు ఎక్కువ కంపెనీలు ఉపయోగిస్తున్నాయి. శాంసంగ్ కంపెనీ సొంతంగా ప్రాసెసర్లను అభివృద్ధి చేసుకుంది.
ఇంటర్నల్ మెమోరీ
ఫోన్యాప్లు ఇంటర్నల్ మెమోరీలోనే ఇన్స్టాల్ అవుతాయి కాబట్టి ఇది ఎంత ఎక్కువగా ఉంటే అన్ని ఎక్కువ యాప్స్ను ఇన్స్టాల్ చేసుకోవచ్చు. కొన్ని యాప్లు ఎక్స్టర్నల్ మెమోరీలో కూడా ఇన్స్టాల్ అయినప్పటికీ అన్ని యాప్లు దీన్ని సపోర్ట్ చేయవు. యాప్లు నడిచే సమయంలో క్యాషే కూడా స్టోర్ అవుతుంది. ఇది కూడా ఇంటర్నల్ మెమోరీపైనే ఆధారపడి ఉంటుంది.
ఇంటర్నల్ మెమోరీ ఎక్కువగా ఉన్న ఫోన్ను ఎలాంటి సమస్య లేకుండా ఉపయోగించుకోవచ్చు. ప్రస్తుతం 64 జీబీ, 128 జీబీ ఇంటర్నల్ మెమోరీతో కూడిన ఫోన్లు ఎక్కువగా మార్కెట్లో ఉన్నాయి. కొన్ని ఫోన్లలో 256జీబీ అంతకంటే ఎక్కువ మెమోరీ కూడా ఉంటుంది.
కేవలం యాప్లకు సంబంధించి మాత్రమే కాకుండా.. ఫోన్లో ఫోటోలు, వీడియోలు, ఆడియోల దాచుకునేందుకు కూడా ఇంటర్నల్ మెమోరీ అవసరం. ప్రస్తుతం ఫోన్ కెమెరాలు ఎక్కువ పిక్సల్ వస్తుండటంతో ఎక్కువ మెమోరీ ఉన్న ఫోన్లు అవసరం అవుతున్నాయి.
ఇవీ చదవండి:
