Security tips for Android phone Users : నేటి ఆధునిక కాలంలో స్మార్ట్ ఫోన్ల వాడ‌కం త‌ప్పనిస‌రి అయ్యింది. క‌మ్యూనికేష‌న్‌, ఎంట‌ర్టైన్మెంట్ ఇలా ఏ ర‌కంగానైనా స‌రే.. దాదాపు ప్రతి ఒక్క‌రూ స్మార్ట్ఫోన్ను ఉప‌యోగిస్తున్నారు. అయితే స్మార్ట్ ఫోన్లు వాడే వాళ్ల‌లో ఆండ్రాయిడ్ వినియోగ‌దారులే అధికం. ఆండ్రాయిడ్ ఫోన్ స‌రిగ్గా ప‌నిచేయాలంటే మీరు ఈ 12 ప‌నులు చేయకూడదు.
సాఫ్ట్ వేర్ అప్డేట్లు
Safety Tips for Android Users : ప్రతి ఆండ్రాయిడ్ ఫోన్లో ఎప్ప‌టిక‌ప్పుడు సాఫ్ట్వేర్ అప్డేట్లు వస్తాయి. దీనివల్ల కొత్త ఫీచ‌ర్లు అందుబాటులోకి వస్తాయి. ఫోన్ పెర్ఫార్మెన్స్ కూడా మెరుగుపడుతుంది. ఇవ‌న్నీ తెలియ‌క కొంత‌మంది తమ ఫోన్ల‌లో వచ్చే అప్డేట్లను పట్టించుకోరు. ఇది మంచిది కాదు. ఎప్ప‌టిక‌ప్పుడు సాఫ్ట్ వేర్ అప్డేష‌న్ చేయ‌డం వల్ల మ‌న ఫోన్ హ్యాక్కు గురయ్యే ప్ర‌మాదం నుంచి కాపాడుకోవ‌చ్చు. దీనికి సంబంధించిన నోటిఫికేష‌న్లు మీ ఫోన్కు వ‌స్తూనే ఉంటాయి. అలా రాక‌పోతే మీరే సెట్టింగ్స్లోని సిస్టం అప్టేట్స్పై క్లిక్ చేసి ఆ వివ‌రాలు తెలుసుకోవ‌చ్చు.
బ్యాక్గ్రౌండ్ యాప్స్ ర‌న్ చేయ‌డం
చాలామంది తమ ఫోన్ల‌లో అవ‌స‌రం ఉన్నప్పుడు అనేక యాప్స్ డౌన్లోడ్ చేసుకుంటారు. అది తీరిపోయాక అవ‌స‌రం లేక‌పోయినా అలాగే ఉంచుకుంటారు. అవి బ్యాక్గ్రౌండ్లో ర‌న్ అవుతాయి. వీటి వల్ల బ్యాటరీ సామ‌ర్థ్యం చాలా త‌గ్గిపోతుంది. ఇది ఫోన్ స్లో అవ‌డానికి కార‌ణ‌మ‌వుతుంది. దీన్ని నివారించాలంటే ముందుగా అన‌వ‌స‌ర‌మైన యాప్స్ను తొల‌గించండి. అలాగే మీ సెట్టింగ్స్లోకి వెళ్లి Battery Usageపై క్లిక్ చేస్తే.. అక్క‌డ మీకు ఏ యాప్లు ఎంత బ్యాట‌రీని ఉప‌యోగిస్తున్నాయో లిస్టు వ‌స్తుంది. దాని ప్ర‌కారం యాప్లను తొల‌గించ‌వ‌చ్చు. లేదా ఇన్ యాక్టివ్ చేయ‌వ‌చ్చు.
డిస్ప్లేపై ఎక్కువ విడ్జెట్స్!
ప్రతి ఆండ్రాయిడ్ ఫోన్లో విడ్జెట్స్ ఆప్షన్ ఉంటుంది. అయితే డిస్ప్లేపై చాలా విడ్జెట్లు ఉండ‌టం వల్ల ఫోన్ ఇంట‌ర్ఫేస్ చింద‌ర‌వంద‌ర‌గా అనిపిస్తుంది. దాంతో పాటు హోమ్ స్క్రీన్ నావిగేట్ చేయ‌డంలో ఇబ్బందిని క‌లిగిస్తాయి. పైగా ఇవి ఫోన్ బ్యాట‌రీపై ప్ర‌భావం చూపిస్తాయి. అవి బ్యాక్గ్రౌండ్లో ర‌న్ అవ్వడం వల్ల కొన్ని విలువైన వ‌న‌రుల్ని వినియోగించుకుంటాయి. కాబట్టి అన‌వ‌స‌ర‌మైన విడ్జెట్స్ను తీసేయ‌డం మంచిది. దీని కోసం డిస్ప్లేపై ఉండే విడ్జెట్స్ పైన లాంగ్ ప్రెస్ చేస్తే.. రిమూవ్ అనే ఆప్షన్ వ‌స్తుంది. దాన్ని ప్రెస్ చేస్తే స‌రిపోతుంది.
స్టోరేజి గురించి ప‌ట్టించుకోక‌పోవ‌డం
కొనుగోలు చేసిన కొన్ని రోజుల‌కే ఫోన్.. ఫొటోలు, వీడియోలు, ఇత‌ర ఫైల్స్, యాప్స్తో నిండిపోతుంది. ఫ‌లితంగా స్టోరేజీ ఫుల్ అయిపోతుంది. దీని వల్ల మీరు కొత్త అప్డేట్లు పొంద‌క‌పోవ‌టం, ఫొటోలు, వీడియోలు తీసుకోక‌పోవ‌డం, కొత్త ఫైల్స్ సేవ్ చేసుకోలేని స్థితిలో ఉంటారు. ఫ‌లితంగా ఇది ఫోన్ ప‌నితీరుపై తీవ్ర ప్ర‌భావం చూపిస్తుంది. స్టోరేజీ ఫుల్ అయితే.. యాప్స్ ఓపెన్ చేయడానికి కూడా ఇబ్బందులు ఎదుర్కొవాల్సి వ‌స్తుంది. అందుకే ఎప్ప‌టిక‌ప్పుడు స్టోరేజీ ఎంత ఉందో తెలుసుకోవ‌డం అవ‌స‌రం. దీనికోసం సెట్టింగ్స్లోకి వెళ్లి Find Device లేదా About Device పై క్లిక్ చేయాలి. ఆ తర్వాత Storageపై క్లిక్ చేస్తే ఎంత ఉందో తెలిసిపోతుంది.
వేరే సోర్స్ నుంచి యాప్స్ ఇన్స్టాల్ చేసుకోవడం
చాలా మంది కొన్ని ఫీచ‌ర్ల కోసం థ‌ర్డ్ పార్టీ నుంచి యాప్స్ డౌన్లోడ్ చేసుకుంటారు. కానీ ఇలా చేయ‌డం ప్ర‌మాద‌క‌రం. అలాంటి వాటిల్లో హానిక‌ర‌మైన మాల్వేర్లు, స్పైవేర్లు ఉండే అవ‌కాశ‌ముంది. ఆ యాప్స్కు మనం ఇచ్చే ప‌ర్మిష‌న్ల వల్ల.. స‌మాచారం మొత్తం దొంగిలించే ప్ర‌మాద‌ముంది. కాబట్టి అలాంటి వెంట‌నే తొల‌గించి, కావాల్సిన యాప్స్ను గూగుల్ ప్లే స్టోర్ నుంచి డౌన్లోడ్ చేసుకోండి.
క్యాష్ (cache) పేరుకుపోవ‌డం
మనం ఇంటర్నెట్ ద్వారా ఎప్పుడూ ఏదో ఒక వెబ్‌సైట్‌ చూస్తూనే ఉంటాం. వస్తువులు కొంటుంటాం. బ్యాంకు లావాదేవీలు నిర్వహిస్తుంటాం. ఈ క్రమంలో బ్రౌజర్‌.. మనం చూసిన వెబ్‌సైట్లు, వాడిన పాస్‌వర్డ్‌లు, డౌన్లోడ్ చేసిన పత్రాలు.. ఇలా ఎంతో సమాచారాన్ని సేకరించుకొని పెట్టుకుంటుంది. దీన్నే క్యాష్ (cache) అంటారు. రాన్రానూ ఇది ఫోన్ పనితీరు మీద భారం పెరిగేలా చేస్తుంది. అందువల్ల క్యాష్ను క్లియర్ చేసుకోవడం మంచిది. క్యాష్ను క్లియర్ చేయడానికి Settingsలోకి వెళ్లి Apps & Storage పై క్లిక్ చేస్తే.. అక్క‌డ యాప్స్ లిస్టు క‌నిపిస్తుంది. అందులో కావాల్సిన యాప్‌ను సెలెక్ట్ చేసుకుని క్యాష్ను క్లియర్ చేసుకోవ‌చ్చు.
బ్యాటరీ ఆప్టిమైజేష‌న్ సెట్టింగ్స్ను వినియోగించక‌పోవ‌డం
అన్ని ఆండ్రాయిడ్ ఫోన్ల‌లో Power Saving Mode ఉంటుంది. దీన్నే Battery Saver అని కూడా అంటాం. చాలా మందికి ఇది తెలియ‌దు. కొంద‌రు ఉన్నా ఉప‌యోగించుకోరు. అయితే దీని వల్ల అనేక లాభాలున్నాయి. ఇది అత్య‌వ‌స‌ర స‌మ‌యంలో ఉప‌యోగ‌ప‌డ‌ట‌మే కాకుండా.. బ్యాటరీ సామ‌ర్థ్యం పెరిగేందుకు తోడ్పడుతుంది. ఛార్జింగ్ త‌క్కువ‌గా ఉన్నప్పుడు ఆన్ చేయ‌డం ఆటోమేటిక్ బ్రైట్నెస్ త‌గ్గడం, బ్యాక్గ్రౌండ్లో ర‌న్ అయ్యే యాప్స్ ఆగిపోవ‌డం వంటి కొన్ని ఫంక్ష‌న్లు తాత్కాలికంగా ఆగిపోయి బ్యాటరీ సేవ్ అవుతుంది. దీన్ని ఆన్ చేసుకోవ‌డానికి డ్రాప్డౌట్ మెనూను కిందికి స్క్రోల్ చేస్తే అందులో Battery Saver అని ఉంటుంది. లేదా Settings లోకి వెళ్లి Battery ఆప్ష‌న్పై క్లిక్ చేస్తే.. Power Saving Mode లేదా Battery Saver అని ఉంటుంది.
అన్ని నోటిఫికేష‌న్లు ఆన్ చేసుకోవడం
యాప్స్కు సంబంధించి అప్డేట్లు నోటిఫికేష‌న్ల రూపంలో వస్తాయి. కానీ అదే ప‌నిగా వచ్చే విప‌రీత‌మైన నోటిఫికేష‌న్ల వల్ల చికాకు వ‌స్తుంది. దీన్ని నివారించ‌డం కోసం రెండు మార్గాలున్నాయి. Do Not Disturb (DND)ను ఆన్ చేసుకోవడం. దీన్ని ఆన్ చేయాలంటే డ్రాప్డౌన్ మెనూను కింద‌కు స్క్రోల్ చేస్తే అక్క‌డ Do Not Disturb ఆప్షన్ ఉంటుంది. దీని వల్ల నోటిఫికేష‌న్లు వస్తాయి కానీ ఆ స‌మ‌యంలో ఎలాంటి సౌండ్ రాదు. ఇలా కాకుండా కొన్ని యాప్స్కు మాత్ర‌మే రావాలంటే.. Settings ఓపెన్ చేసి Notificationsను సెలెక్ట్ చేసుకోవాలి. తర్వాత App Notificationsపై క్లిక్ చేస్తే యాప్స్ లిస్టు వ‌స్తుంది. మీకు కావాల్సిన వాటివి మాత్ర‌మే ఆన్ చేసుకుని మిగిలినవి ఆఫ్ చేసుకోవ‌చ్చు.
రీస్టార్ట్ చేయ‌కుండా ఉండ‌టం
రోజూ ఎక్కువ‌గా ఫోన్ను ఉప‌యోగించే క్రమంలో కొంద‌రు రీస్టార్ట్ చేయ‌డం మ‌ర్చిపోతుంటారు. కానీ క‌నీసం వారానికోసారి ఫోన్ను స్విచ్ ఆఫ్ చేసి రీస్టార్ట్ చేయ‌డం వల్ల దాని పనితీరు మెరుగుపడుతుంది. సాఫ్ట్వేర్కు సంబంధించిన స‌మ‌స్య‌లు త‌లెత్త‌వని టెక్ నిపుణులు తెలిపారు. శామ్ సంగ్ లాంటి కొన్ని కంపెనీలు తమ ఫోన్ల‌లో ఆటో రీస్టార్ట్ ఆప్ష‌న్ను ఇస్తున్నాయి. దీని వల్ల మీరు సెట్ చేసిన టైమ్కు ఆటోమేటిక్‌గా ఫోన్ రీస్టార్ట్ అవుతుంది. దీనికోసం Settings ఓపెన్ చేసి General Managementను సెలెక్ట్ చేసుకుంటే అక్క‌డ Reset Followed by Auto Restart ఆప్షన్ వ‌స్తుంది. దీనిపై ప్రెస్ చేసి మీరు అనుకున్న టైమ్ను సెట్ చేస్తే స‌రి.
సెక్యూరీటి యాప్స్ లేకుండా ఉండ‌టం
చాలా మంది తమ ఫోన్ల‌లో సెక్యూరిటీ గురించి పెద్ద‌గా పట్టించుకోరు. ఎలాంటి భ‌ద్ర‌తా యాప్స్ ఉప‌యోగించ‌కుండానే వాడ‌తారు. దీనివల్ల మ‌న స‌మాచారానికి ముప్పు వాటిల్లే అవ‌కాశ‌ముంది. అందుకే ఏదైనా Antivirus Software App ఇన్స్టాల్ చేసుకోవడం లేదా Two-Factor Authentication (2FA) ఎనేబుల్ చేసుకోవడం ఉత్తమం.
బ్యాక‌ప్స్ను నివారించ‌డం
మ‌న ఫోన్లో ఫొటోలు, వీడియోల రూపంలో ఎన్నో జ్ఞాప‌కాలు ఉంటాయి. వాట‌న్నిటినీ ప‌దిలం చేసుకోవాలంటే బ్యాక‌ప్ చేసుకోవాలి. కొన్ని కార‌ణాల వల్ల చాలా మంది ఇలా చేయ‌రు. కానీ అనుకోకుండా కొన్ని సార్లు ఫోన్ ప‌నిచేయ‌క‌పోవ‌డం, హార్డ్వేర్ ఫెయిల్ వంటి ఘ‌ట‌న‌లు జ‌రిగినప్పుడు డేటా మొత్తం పోతుంది. ఇలా జ‌ర‌గ‌కుండా ఉండాలంటే వాటిని గూగుల్ డ్రైవ్ వంటి క్లౌడ్ స్టోరేజీ యాప్స్లో బ్యాక‌ప్ చేసుకోవడం బెట‌ర్‌.
బ్యాటరీ ఖాళీ అయ్యే వ‌ర‌కు చూడొద్దు
ఆండ్రాయిడ్ ఫోన్ల‌లో లిథియం అయాన్ బ్యాట‌రీలు ఉంటాయి. ఫోన్ విప‌రీతంగా వాడి వెంట‌నే ఛార్జింగ్ పెట్ట‌డం, త‌ర‌చూ బ్యాటరీ శాతం సున్నాకు తీసుకురావ‌డం దాని పనితీరు మీద తీవ్ర ప్ర‌భావం ప‌డుతుంది. కాబట్టి బ్యాటరీ 20 - 40 శాతం మ‌ధ్య ఉన్న‌ప్పుడే ఛార్జింగ్ పెట్ట‌డం ఉత్తమం. మ‌రోవైపు 100 శాతం కాక‌ముందే తీసేయాలి. అలా చేయ‌కుంటే హై వోల్టేజీ వల్ల ఇబ్బందులు వస్తాయి. దీంతో పాటు వాహ‌నాల్లో ఉండే ఛార్జ‌ర్లు, యూఎస్బీ పోర్ట‌ర్లు పెట్ట‌వ‌ద్ద‌ని నిపుణులు చెబుతున్నారు.
ఇవీ చదవండి:
- త్వరలోనే రెడ్మీ 12 లాంఛ్.. తక్కువ బడ్జెట్లోనే అదిరే ఫీచర్స్!
- రూ.15 వేలలోపు 5G ఫోన్ కొనాలా?.. బెస్ట్ మోడళ్లు ఇవే.. ఫీచర్స్ అదుర్స్!
