మానవ ప్రగతి ప్రస్థానంలో విద్యే సిసలైన వికాస దీపం. ఆ కాంతిపుంజాల వెలుగులో రేపటి పౌరుల జీవితాలు తేజోమయమయ్యేలా గురుశ్రేష్ఠులు సాగించే నిబద్ధ కృషే అర్థవంతమైన జాతి నిర్మాణం. ప్రతి బడీ దేశప్రగతికి నారుమడై వర్ధిల్లాలంటే- సరైన మౌలిక వసతులు, ఆహ్లాదభరిత వాతావరణం, అంకితభావం కలిగిన బోధన సిబ్బందికి విద్యాలయ ప్రాంగణాలు చెరగని చిరునామాలు కావాలి. వాస్తవంలో తాగునీటికి, మరుగుదొడ్లకు సైతం నోచని పాఠశాలలు దేశంలో ఇంకా వేలసంఖ్యలో ఉన్నట్లు కేంద్ర విద్యామంత్రి రమేశ్‌ పోఖ్రియాల్‌ పార్లమెంట్లో తాజాగా చేసిన ప్రకటన స్పష్టీకరిస్తోంది. 42వేల సర్కారీ బడుల్లో గుక్కెడు గంగకు, 15వేల పాఠశాలల్లో అత్యవసరమైన మరుగుదొడ్లకు నేటికీ కరవేనని అమాత్యులు చెబుతున్నా- నిర్దేశిత గడువులోగా నూరుశాతం లక్ష్యం సాధించేసినట్లు 'స్వచ్ఛ విద్యాలయ పోర్టల్‌' ఆమధ్య ఘనంగా చాటింపు వేసింది. ఆ బడాయి కబుర్లకు 'కాగ్' నివేదిక ఆరు నెలలక్రితమే గాలి తీసేసింది.
కాగ్ నివేదిక
మచ్చుకు 15 రాష్ట్రాల్లో ఎంపిక చేసిన చోట్ల చేపట్టిన క్షేత్రస్థాయి పరిశీలనలో 75 శాతం టాయిలెట్లను పరిశుభ్రంగా నిర్వహించడం లేదని, కనీసం లక్షా 40వేల మరుగుదొడ్లు నిరుపయోగంగా పడి ఉన్నాయని, అసలు నిర్మాణానికే నోచనివి 40 శాతందాకా లెక్క తేలాయని 'కాగ్' తూర్పారపట్టింది. యథార్థాలకు మసిపూసి మారేడు చేసిన చందంగా నీటి సదుపాయలేమి, టాయిలెట్ల నిర్మాణం, మరుగుదొడ్ల అధ్వాన నిర్వహణపై దొంగలెక్కలు ఇప్పటికీ విరివిగా చలామణీ అవుతూనే ఉన్నాయి! మరోవైపు, దేశంలో ఉపాధ్యాయ శిక్షణ సంస్థలెన్నో అవినీతిమయమై నేలబారు ప్రమాణాలకు నెలవయ్యాయన్న అజీమ్‌ ప్రేమ్‌జీ విశ్వవిద్యాలయ అధ్యయనాంశాలు దిగ్భ్రాంతపరుస్తున్నాయి. గురువులకు సరైన ఒరవడి దిద్దాల్సిన శిక్షణ సంస్థలే సర్వభ్రష్టమైతే వాటిల్లే దుష్పరిణామాలు అడుగడుగునా ప్రస్ఫుటమవుతున్నాయి. బడి చదువుల గతిరీతుల ప్రాతిపదికన ఇండియా యాభైఏళ్లు వెనకబడి ఉందన్న 'యునెస్కో' నిర్ధారణకు మూలాలు ఎక్కడున్నాయో వేరే చెప్పేదేముంది?
లోపించిన ప్రణాళిక
ఏ దేశమైనా చదువులకోసం చేసే ఖర్చు మెరుగైన భవితవ్యాన్ని లక్షించిన అమూల్య పెట్టుబడి. ఈ వాస్తవిక స్పృహతో ప్రాథమిక విద్యపై ప్రత్యేక శ్రద్ధ కనబరుస్తున్న ఫిన్‌లాండ్‌, నార్వే, స్విట్జర్లాండ్‌, దక్షిణ కొరియా ప్రభృత దేశాలు ప్రణాళికాబద్ధ మానవ వనరుల అభివృద్ధికి విశిష్ట ఉదాహరణలుగా వెలుగులీనుతున్నాయి. కొన్ని చోట్ల వైద్య నిపుణులతో సమానంగా ఉపాధ్యాయులకు జీతభత్యాలిస్తున్న తీరు- విద్యార్థుల్ని శ్రద్ధగా సాకడం, ముడి వజ్రాలకు సానపట్టడం పట్ల ఆయా ప్రభుత్వాల అభినివేశాన్ని చాటుతోంది. అటువంటి పకడ్బందీ ప్రణాళిక, పటుతర కార్యాచరణ కొరవడి ఎన్నో ఏళ్లుగా దేశం ఎంతగానో నష్టపోయింది. పిల్లల గ్రహణ శక్తికి, అభ్యసన సామర్థ్యానికి ఒడుపుగా పదును పెట్టే గురువులు, అంతర్నిహిత సృజనశక్తిని వెలికితీసే వాతావరణం కరవైన పర్యవసానంగా దాపురించిన బట్టీయం చదువులు ఎన్నో తరాల్ని నిర్వీర్యం చేశాయి.
ఇకనైనా ఈ దురవస్థను బదాబదలు చేయాలన్న సత్సంకల్పంతో కేంద్ర, రాష్ట్ర ప్రభుత్వాలు వార్షిక బడ్జెట్లలో విద్యకు సహేతుక కేటాయింపులు ప్రసాదించాలి. వసతుల మెరుగుదలకు, ఉపాధ్యాయుల ఖాళీల భర్తీకి, బోధన సిబ్బంది నిరంతర శిక్షణకు అగ్ర ప్రాధాన్యమివ్వాలి. చెదలు పడుతున్న చదువుల్ని తుడిచిపెట్టి ఆధునిక ఆవిష్కరణలు, భావితరాల అవసరాలకు అనుగుణంగా ఎప్పటికప్పుడు పాఠ్యప్రణాళికల్ని ప్రక్షాళిస్తుండాలి. ముక్కునపట్టి చీదే భ్రష్టపద్ధతులకు తిలోదకాలిచ్చి, కేవలం మార్కుల సాధనకే వెంపర్లాడే ధోరణుల్ని దుంపనాశనం చేసి- ప్రపంచంలో ఏ మూల ఎక్కడికెళ్ళినా ఎవరితోనైనా సరే పోటీపడేలా మన ఆశాదీపాల్ని తీర్చిదిద్దేదే, సమున్నత విద్యావిధానం. అందుకు జాతీయ స్థాయిలో దృఢదీక్ష వ్యక్తమైతేనే- పనికొచ్చే చదువులు, జాతిని తలెత్తుకునేలా చేసే స్థాయీప్రమాణాలు సుసాధ్యమవుతాయి!
ఇదీ చదవండి : ఆ పాఠశాలలో మధ్యాహ్న భోజనానికి 'పశువుల దాణా'!
