International Day for the Elimination of Violence against women : నిర్భయ, దిశ, హథ్రాస్‌ చేదు జ్ఞాపకాలు ఇంకా వెంటాడుతుండగానే ఇప్పుడు శ్రద్ధావాకర్‌ ఘటన. ఇవి మాత్రమేనా? పసిపిల్లలపై అఘాయిత్యాలూ, అత్తింటి ఆరళ్లు, లైంగిక వేధింపులు ఇలా ఒక్కటేమిటి మన చుట్టూ లెక్కలేనన్ని సంఘటనలు. అందుకే ‘మహిళలపై జరుగుతోన్న హింస ప్రపంచంలోనే అత్యంత పెద్ద ఎత్తున సాగుతోన్న మానవ హక్కుల ఉల్లంఘన’ అంటోంది ఐక్యరాజ్య సమితి. ప్రతి పదకొండు నిమిషాలకు ఓ మహిళ లేదా బాలిక మరణం ఆమె సన్నిహితుల చేతుల్లోనే జరుగుతోందంటున్నాయి ఐరాస నివేదికలు. నేషనల్‌ క్రైమ్‌ రికార్డ్స్‌ బ్యూరో గణాంకాల ప్రకారం గడిచిన ఆరేళ్లతో పోలిస్తే 2021లో అత్యధికంగా వేధింపులు జరిగాయి. ఆరేళ్ల క్రితంతో పోలిస్తే ఇది 26.35 శాతం ఎక్కువ.
ట్రోలింగ్‌ పట్టించుకోవద్దు..: పూజా హెగ్డే
మహిళలపై భౌతికంగానే కాదు.. ఆన్‌లైన్‌లోనూ వేధింపులు పెరుగుతున్నాయి. కట్టూ, బొట్టూ, నడత... అన్నింటినీ జడ్జ్‌ చేస్తూ ట్రోలింగ్‌ చేస్తున్నారు. ఈ తరహా వేధింపులు స్త్రీలను మానసికంగా కుంగదీస్తూ, కొన్నిసార్లు చావు అంచుల వరకూ తీసుకెళ్తున్నాయి. దీనికి అడ్డుకట్ట పడాలంటే ట్రోలర్స్‌, ఫేక్‌ ఖాతాదారుల విషయంలో ప్రభుత్వాలు కఠినంగా వ్యవహరించాలి. నేను వీటిని పట్టించుకోను. అందుకే ఎప్పుడూ సంతోషంగా ఉంటా.
గొంతు విప్పితేనే న్యాయం..!
కరోనా కాలంలో ఎన్నో బాల్యవివాహాలని అడ్డుకున్నాం. ఈ క్రమంలో మాపైనా దాడులు జరిగాయి. ఇక నిత్యం గృహహింసకు గురవుతోన్న మహిళలూ పెద్ద సంఖ్యలోనే ఉన్నారు. చాలా కేసుల్లో బాధితులు బయటకి రారు. నోరు విప్పరు. తమకేది కావాలో తాము నిర్ణయించుకోలేరు. అందుకే మహిళ పరిస్థితిలో మార్పు రావడం లేదు. విద్య, ఉద్యోగాల్లో ముందుకు వెళ్తూ, నైపుణ్యాలను పెంచుకుంటే ప్రశ్నించే స్థైర్యం అలవడుతుంది. మహిళలందరూ తప్పనిసరిగా ఆత్మరక్షణ విద్యలు నేర్చుకుంటే స్థైర్యం పెరుగుతుంది.
చూసీ చూడనట్లు వదిలేయొద్దు...
ఇంటా, బయటా వేధింపులను అడ్డుకోవాలంటే ముందు మనమే మారాలి. మనకోసం మనం నిలబడాలి. ఎవరో ఏదో అంటారని న్యూనతకి లోనవ్వకూడదు. ఇంట్లో భర్తలు చేసే బాడీషేమింగ్‌, సూటిపోటి మాటలు పైకి కనిపించవు. వాటిని మొదట్లోనే అడ్డుకోవాలి. ఆత్మాభిమానానికి ఇబ్బంది ఎదురైనప్పుడు చూసీ చూడనట్లు వదిలేయడం మొదలుపెడితే అలుసుగా తీసుకుంటారు. మౌనంగా ఆ హింసను భరించటమో, ఆత్మహత్యో పరిష్కారం కాదు. కౌన్సెలర్ల సాయం తీసుకోండి. కొంత తేలికపడగలరు.
భయపడితే బలవుతారు...
పరువు కోసమో, బయటకి చెబితే హాని కలుగుతుందనో భయపడి బయటకు చెప్పలేని మహిళల్నే నిందితులు టార్గెట్‌ చేసుకుంటారు. అందుకే ఏ సందర్భంలోనూ మనోధైర్యాన్ని కోల్పోవద్దు. కఠినమైన చట్టాలున్నాయి. తప్పుచేస్తే కచ్చితంగా దొరికిపోతారు. ఫిర్యాదు చేయడానికి వెనుకాడొద్దు. ఇంట్లో వాళ్ల నుంచే ఇబ్బందులు ఎదురైతే దగ్గరి వాళ్లకి చెప్పండి. లేదా డయల్‌ 100కి ఫిర్యాదు చేయండి.
అవగాహన పెంచుకుంటేనే...
మహిళల రక్షణకోసం ఎన్నో చట్టాలున్నాయి. వాటి సాయంతో ధైర్యంగా పోరాడొచ్చు. కుటుంబ సభ్యులూ, పోలీసుల అండ ఉంటే మహిళలకు కచ్చితంగా న్యాయం జరుగుతుంది. లైంగిక దాడులు, వేధింపులు, కిడ్నాప్‌, హింస, ఆమ్లదాడులు వంటి నేరాలకు పాల్పడిన వారి నుంచి నేర సంబంధిత న్యాయ సవరణ చట్టం -2013 (నిర్భయ చట్టం) రక్షణ కల్పించడంతో పాటు నిందితులకు శిక్షలు పడేలా చేస్తుంది. కట్నం వేధింపులు, వివాహేతర సంబంధాల వల్ల బాధితులుగా మారిన వారికి గృహహింస చట్టం-2005 రక్షణ కల్పిస్తుంది. ఇవి కాకుండా పనిచేసే చోట లైంగిక వేధింపుల నిరోధక చట్టం, స్త్రీల అసభ్య చిత్ర నిషేధ చట్టం- 1986 వంటివెన్నో స్త్రీలకు అండగా ఉన్నాయి.
గృహహింసకి సంబంధించి జాతీయ మహిళా కమిషన్‌ వాట్సప్‌ నెంబర్‌: 72177-35372తో పాటు ఆ సంస్థ వెబ్‌సైట్‌లోనూ ఫిర్యాదు చేయొచ్చు. తెలంగాణ, ఆంధ్రప్రదేశ్‌ రాష్ట్రాల్లో బాధితులెవరైనా 181, 1091, 100 టోల్‌ఫ్రీ నంబర్లకు ఫోన్‌ చేస్తే తక్షణం పోలీస్‌ సాయం అందుతుంది. రెండు రాష్ట్రాల్లోని స్త్రీ, శిశు సంక్షేమ కార్యాలయాల్లోనూ ఫిర్యాదు చేసే వ్యవస్థలు ఉన్నాయి.
కన్నీటిని కన్నీటితోనే తుడవలేం. కార్యాచరణ కావాలి. ఆచరణ వైపు వేగంగా అడుగులు పడాలి. ఇందుకు అందరూ కలిసికట్టుగా నడవాలని పిలుపు నిచ్చింది ఐక్యరాజ్య సమితి. అందుకే ఈ ఏడాది ‘యునైట్‌’ అనే అంశాన్ని గ్లోబల్‌ థీమ్‌గా ప్రకటించింది.
ఇవీ చూడండి..
