యువకుడి ఆత్మహత్యాయత్నం... సెల్ఫీ వీడియో కాపాడింది

స్నేహితులకు పంపిన సెల్ఫీ వీడియో ఓ యువకుడి ప్రాణాలను కాపాడింది. వ్యక్తిగత కారణాలతోనే బలవన్మరణానికి పాల్పడుతున్నట్లు తీసిన సెల్ఫీ వీడియోనే అతని పాలిట వరమైంది. బుధవారం ఉదయం ఇంట్లో నుంచి వెళ్లిన రాజేందర్​ అనే యువకుడు ఆత్మహత్యాయత్నం చేశాడు. వీడియో చూసి వెంటనే అప్రమత్తమైన స్నేహితులు, కుటుంబసభ్యులు యువకుడి ప్రాణాలు కాపాడారు.

స్నేహితులకు పంపిన సెల్ఫీ వీడియో అతని పాలిట వరమైంది. ఆత్మహత్యాయత్నం చేసిన యువకుడు ప్రాణాలతో బయటపడ్డాడు. జగిత్యాల జిల్లా మెట్​పల్లి మండలంలోని చింతలపేట గ్రామానికి చెందిన కొత్తూరు రాజేందర్ అనే యువకుడు బలవన్మరణానికి యత్నించాడు. ఉదయం ఇంట్లో నుంచి బయటకు వెళ్లి... తర్వాత తన వ్యక్తిగత కారణాలతోనే ఆత్మహత్య చేసుకుంటున్నానని, దీనికి ఎవరూ కారణం కాదంటూ తన సెల్​ఫోన్​లో సెల్ఫీ వీడియో తీసుకుని వాట్సాప్ ద్వారా స్నేహితులకు పంపాడు.

ఈ విషయం తెలియడంతో కుటుంబ సభ్యులు, స్నేహితులు, గ్రామస్థులు యువకుని కోసం గాలించారు. ఎట్టకేలకు యువకుని ఆచూకీ కనిపెట్టి మెట్​పల్లిలోని ఓ ప్రైవేటు ఆస్పత్రికి తరలించారు. చికిత్స అనంతరం ఆత్మహత్య కారణాలు వెలువడనున్నాయి.

ఇదీ చదవండి: ఉద్యోగం ఇప్పిస్తానని మోసం..లక్షా 80 వేలకు టోకరా