ఇంట్లో మందు పార్టీ చేశారు.. ఆ ఇల్లునే గుల్ల చేశారు.!

అర్ధరాత్రి ఇంట్లో చొరబడ్డారు. అందినకాడికి దోచుకున్నారు. అనంతరం ఇంట్లోనే కూర్చుని తాపీగా మందు కొట్టారు. సగం తాగిన మద్యం బాటిల్‌ను అక్కడే వదిలేసి పరారయ్యారు. ఈ ఘటన ముషీరాబాద్‌ పోలీస్‌స్టేషన్‌ పరిధిలో చోటుచేసుకుంది.

ముషీరాబాద్ పోలీస్‌స్టేషన్ పరిధి రామ్‌నగర్‌లోని ఎస్‌ఆర్‌టీ కాలనీలో చోరీ జరిగింది. అర్ధరాత్రి సమయంలో పాండు అనే వ్యక్తి ఇంట్లో చొరబడిన దుండగులు సుమారు 7 తులాల బంగారు ఆభరణాలు, 40 తులాల వెండి వస్తువులతో పాటు నగదు అపహరించారు.

స్థానికంగా ఉన్న ఓ భవనంలో అద్దెకుంటున్న పాండు.. బంధువుల ఇంట్లో శుభకార్యానికి వెళ్లాడు. అతని కుమారుడు బుధవారం రాత్రి ఇంటికి తాళం వేసి.. భవన యజమానికి తాము బయటకు వెళుతున్నట్లు చెప్పి వెళ్లాడు. ఈ క్రమంలోనే అర్ధరాత్రి సమయంలో పాండు ఇంట్లోకి చొరబడిన దుండగులు.. బీరువాను పగులగొట్టి సుమారు 7 తులాల బంగారు ఆభరణాలు, 40 తులాల వెండి వస్తువులతో పాటు రూ.30 వేల నగదు, దేవుడి హుండీలో ఉన్న మరికొంత నగదు ఎత్తుకెళ్లారు.

ఈ మేరకు పాండు పోలీస్‌ స్టేషన్‌లో ఫిర్యాదు చేశాడు. పోలీసులు ఘటనా స్థలిని పరిశీలించారు. బీరువా ముందు సగం తాగి ఉన్న మద్యం బాటిల్‌ను స్వాధీనం చేసుకున్నారు. చోరీ అనంతరం దొంగలు మద్యం సేవించి ఉంటారని భావిస్తున్నారు. సమీపంలోని సీసీ ఫుటేజీలను పరిశీలిస్తున్నారు.