అక్రమవ్యాపారాలపై సూర్యాపేట జిల్లా పోలీసుల ఉక్కుపాదం

సూర్యాపేట జిల్లాలో అక్రమ వ్యాపారులపై దాడులను పోలీసులు తీవ్రతరం చేశారు. బృందాలుగా ఏర్పడి రెండు రోజులుగా అక్రమ వ్యాపారాలపై మూకుమ్మడి దాడులు జరిపారు. సూర్యాపేట పట్టణ పోలీసులు, టాస్క్​ఫోర్స్ పోలీసుల సంయుక్త దాడుల్లో 16 ఇసుక ట్రాక్టర్లు సీజ్ చేశారు.

పేట్రేగిపోతున్న ఇసుక అక్రమ రవాణా, నిషేధిత గుట్కా దందాలకు అడ్డుకట్ట వేసేందుకు సూర్యాపేట జిల్లా పోలీసులు చర్యలు ముమ్మరం చేశారు. జిల్లా ఎస్పీ ఆర్.భాస్కరన్ ఆదేశాల మేరకు రంగంలోకి దిగిన పోలీసులు... రెండు రోజులుగా పట్టణంలోని అక్రమ వ్యాపారాలపై మూకుమ్మడిగా దాడులు నిర్వహించారు.

ఈ దాడుల్లో ఇప్పటివరకు లక్షన్నర విలువైన గుట్కా పాకెట్లను సీజ్ చేశారు. 4 కేసులు నమోదు చేసిన పోలీసులు... ఆరుగురు నిందితులను అదుపులోకి తీసుకున్నారు. మరోవైపు అక్రమంగా తరలిస్తున్న 16 ఇసుక ట్రాక్టర్లను పట్టుకున్న టాస్క్​ఫోర్స్ పోలీసులు... 35 మందిపై కేసులు నమోదు చేశారు. రెండు రోజులుగా నిర్వహించిన దాడుల్లో పట్టణ సీఐ ఆంజనేయులు, టాస్క్​ఫోర్స్ ఇంఛార్జ్ ఇన్​స్పెక్టర్ నిరంజన్, సీసీఎస్​ సిబ్బంది, పట్టణ ఎస్సైలు భిక్షపతి, శ్రీనివాస్, ఏడుకొండలు, పట్టణ పోలీసు సిబ్బంది పాల్గొన్నారు.

ఇదీ చూడండి: 'ఆన్​లైన్​లో చేతబడి నేర్చుకుని అలా చేశారు... చివరకు ఇలా దొరికారు'