అక్రమంగా రేషన్ బియ్యం తరలిస్తున్న సమాచారంతో రెడ్హ్యాండెడ్గా పట్టుకుందామని వెళ్లిన ఓ యూట్యూబ్ ఛానల్ రిపోర్టర్... కిడ్నాప్నకు గురైన ఘటన మేడ్చల్ జిల్లా దుండిగల్లో చోటుచేసుకుంది. షాపూర్నగర్కు చెందిన అజ్మత్ అలీ (32) ఓ యూట్యూబ్ ఛానల్లో రిపోర్టర్గా పనిచేస్తున్నాడు. మంగళవారం రాత్రి గాజులరామరం నుంచి ఆటోలో అక్రమంగా రేషన్ బియ్యం తరలిస్తున్నారని సమాచారం అందుకున్నాయి. వెంటనే నలుగురు స్నేహితులతో.. కలిసి రొడామేస్ట్రీనగర్లో ఆటోను పట్టుకున్నారు.
రూ.2 లక్షలు డిమాండ్...
ఆటోలో ఉన్న ముగ్గురిని బంధించి వారి యజమానికి ఫోన్ చేసి రూ. 2 లక్షలు డిమాండ్ చేశారు. నగదు ఇవ్వకుంటే పోలీసులకు పట్టిస్తామని బెదిరించారు. కైసర్నగర్ వద్దకు యజమాని రమ్మనగా... వెళ్లారు. అక్కడ బేరసారాలు కుదరకపోవటం వల్ల పోలీసులకు సమాచారం అందించారు.
రిపోర్టర్నే కిడ్నాప్ చేశారు...
కొందరు వ్యక్తులు కారులో వచ్చి ఆటోను అప్పగించాలని కోరగా... లక్ష రూపాయలిస్తే వదిలేస్తామన్నారు. డీల్కు ఒప్పుకున్న వ్యక్తులు... డబ్బులు మియపూర్లో ఇస్తామని అజ్మత్ అలీని కారులో ఎక్కించుకున్నారు. కారులో వెళ్లిన స్నేహితుడు ఎంతసేపటికీ తిరిగి రాకపోవటంతో మిగతావారు పోలీసులకు ఫిర్యాదు చేశారు.
ఫోన్ సిగ్నల్స్ ఆధారంగా...
వెంటనే స్పందించిన పోలీసులు అజ్మత్ అలీ ఫోన్ సిగ్నల్స్ ఆధారంగా దర్యాప్తు చేపట్టారు. అజ్మత్అలీని అనేక ప్రాంతాలు తిప్పి చివరకు తాండూరు తీసుకెళ్లినట్లు గుర్తించారు. విషయం పోలీసులకు తెలిసిందన్న సమాచారంతో అజ్మత్అలీని అక్కడే వదిలేశారు. కిడ్నాపర్లు ఉపయోగించిన కారును పోలీసులు స్వాధీనం చేసుకున్నారు. పోలీసుల అదుపులో నలుగురు నిందితులు ఉన్నట్లు సమాచారం.
