అకస్మాత్తుగా చెలరేగిన మంటలు.. క్షణాల్లో బూడిదైన కారు

ప్రమాదవశాత్తు కారులో మంటలు చెలరేగి దగ్ధమైన ఘటన సంగారెడ్డి జిల్లా జహీరాబాద్​ మండలంలో జరిగింది. మంటలను గుర్తించిన వెంటనే కారు నుంచి దిగిపోవడం వల్ల ప్రాణాపాయం తప్పింది.

ప్రమాదవశాత్తు ఇంజిన్​లో మంటలు చెలరేగి కారు దగ్ధమైన ఘటన సంగారెడ్డి జిల్లా జహీరాబాద్​లో జరిగింది. అల్గోల్ గ్రామానికి చెందిన విక్రమ్ రెడ్డి కుటుంబ సభ్యులతో కలిసి పొలానికి కారులో వెళ్ళాడు. ఇంటికి వచ్చేందుకు కారును వెనక్కి తీస్తుండగా ఇంజిన్​లో పొగలు రావడం గమనించిన కుటుంబ సభ్యులు కేకలు వేశారు.

అప్రమత్తమైన విక్రమ్ రెడ్డి కారు నుంచి దిగిపోయాడు. చూస్తుండగానే మంటలు వ్యాపించి క్షణాల్లో బూడిదయింది. ఘటనలో ప్రాణాపాయం తప్పడం వల్ల అందరూ ఊపిరి పీల్చుకున్నారు.