సంచలనం సృష్టించిన బోయిన్‌పల్లి అపహరణ కేసులో భూమా అఖిల ప్రియను వరుసగా రెండో రోజు పోలీసులు ప్రశ్నించారు. ఉదయం పది గంటల నుంచి సాయంత్రం ఆరు గంటల వరకు ఆమె న్యాయవాది సమక్షంలో విచారించారు. కిడ్నాప్ జరిగిన సమయంలో అఖిల ప్రియ, ఆమె భర్త భార్గవరామ్‌ ఎక్కడున్నారు.. పథకం రచించింది ఎవరు.. ఇతర కుటుంబ సభ్యుల పాత్రపైనా ప్రశ్నల వర్షం కురిపించారు.
తనకు చాలా మంది ఫోన్ చేస్తుంటారు..
అఖిల ప్రియ మాత్రం తనకు ఏమీ తెలియదని, ఈ వ్యవహారంతో ఎటువంటి సంబంధం లేదని పోలీసులకు తెలిపినట్టు సమాచారం. కిడ్నాపర్ల నుంచి అఖిలప్రియకు వచ్చిన ఫోన్లపై దర్యాప్తు అధికారులు ఆరాతీయగా.. రాజకీయ నేతగా ఉన్న తనకు రోజూ ఎంతో మంది ఫోన్ చేస్తుంటారని సమాధానం ఇచ్చినట్టు తెలుస్తోంది. ఉత్తర మండలం డీసీపీ కలమేశ్వర్‌ ఆధ్వర్యంలో ఆమెను విచారించారు.
