కళాశాల యాజమాన్యమే చంపేసింది..!

కళాశాల హాస్టల్​లో ఉన్న విద్యార్థినికి జ్వరమొస్తే పట్టించుకోలేదు. ప్రాణాలు పోయేంతవరకు చూశారు. ఆ తల్లిదండ్రులకు కడుపుకోత మిగిల్చారు.

సూర్యాపేట జిల్లా కేంద్రంలోని శ్రీనిధి జూనియర్ కళాశాల బైపీసీ చదువుతున్న షేక్ షమీనా హాస్టల్​లో ఉంటోంది. శుక్రవారం సాయంత్రం ఐదింటికి ఆమెకు జ్వరం రావడంతో ఆత్మకూర్​ (ఎస్)​ మండలం ఏపూర్​లో ఉన్న తల్లిదండ్రులకు యాజమాన్యం సమాచారం అందించింది. తాము అందుబాటులో లేమని పాపను ఆస్పత్రికి తీసుకువెళ్లాలని ఆమె తల్లిదండ్రులు ప్రాధేయపడ్డారు. అయినా కళాశాల సిబ్బంది నిర్లక్ష్యంగా వ్యవహరించారు. శనివారం ఉదయం తల్లిదండ్రులు వచ్చే వరకు షమీనా గురించి పట్టించుకున్న పాపానపోలేదు. ఈరోజు తల్లిదండ్రులు వచ్చి ఆసుపత్రికి తీసుకెళ్తుండగా మార్గమధ్యలో చనిపోయింది.

శ్రీనిధి కళాశాల తీరుపై మృతురాలి తల్లిదండ్రులు, బంధువులు, విద్యార్థి సంఘాల నాయకులు భగ్గుమంటున్నారు. అనారోగ్యంతో ఉన్న అమ్మాయిని ఆసుపత్రికి తీసుకెళ్లకుండా ప్రాణాలమీదకు తీసుకొచ్చారని కళాశాల ముందు ధర్నాకు దిగారు. పరిస్థితి ఉద్రిక్తంగా మారడంతో పోలీసులు రంగప్రవేశం చేశారు. యాజమాన్యంపై చర్యలు తీసుకోవాలని మృతురాలి తల్లిదండ్రులు వేడుకుంటున్నారు.