సాయం కోరుతూ వచ్చాడు... సెల్ఫోన్ ఎత్తుకెళ్లాడు!
ఏపీలోని అనంతపురంలో ఓ గుర్తు తెలియని వ్యక్తి కొత్త తరహాలో దొంగతనానికి పాల్పడ్డాడు. సాయం చేయాలని కోరుతున్నట్లు నటిస్తూ సెల్ఫోన్ను దోచుకెళ్లాడు. ఈ వ్యవహారమంతా సీసీ పుటేజీలో రికార్డు అయింది. పట్టణంలోని కమలానగర్లోని డీసీఎంఎస్ రోడ్డులో ఉన్న పంచముఖి ప్రింటర్స్ దుకాణానికి గురువారం ఓ గుర్తు తెలియని వ్యక్తి వచ్చాడు.
తనకు మాటలు రావంటూ సైగలు చేస్తూ దుకాణాదారుడికి ఓ కరపత్రాన్ని ఇచ్చాడు. దుకాణాదారుడు 10 రూపాయలు ఇస్తే ఇంకా ఇవ్వమని అడుగుతూ దగ్గరికి వచ్చాడు. అనంతరం అక్కడున్న సెల్ఫోన్ను చాకచక్యంగా కొట్టేశాడు. కొద్దిసేపటికి సెల్ఫోన్ కనిపించకపోవటంతో దుకాణదారుడు సీసీ పుటేజీని పరిశీలించి అవాక్కయ్యాడు. అపరిచిత వ్యక్తులతో జాగ్రత్తగా ఉండాలని పోలీసులు హెచ్చరిస్తున్నారు.
