తూర్పు టర్కీలో సంభవించిన భూకంపంలో మృతుల సంఖ్య 29కి చేరింది. అధికారులు సహాయక చర్యలను ముమ్మరం చేశారు. బాధితులను సురక్షిత ప్రాంతాలకు తరలించారు. శిథిలాల కింద చిక్కుకున్న వారికోసం అన్వేషిస్తున్నారు. సుమారు 3,500 మంది రెస్క్యూ సిబ్బంది తీవ్రంగా శ్రమిస్తున్నారు. బాధితులకు పదివేల పడకలు, దుప్పట్లు, గుడారాలు అందించినట్లు అధికారులు తెలిపారు.
ఈశాన్య రాష్ట్రమైన ఇలాజిగ్లోని సివ్రైస్ పట్టణం కేంద్రంగా 6.8 తీవ్రతతో శుక్రవారం భూకంపం వచ్చింది. తాజాగా శనివారం 5.1 తీవ్రతతో భూమి కంపించినట్లు అధికారులు తెలిపారు. ఈ ఘటనలో 72 భవనాలు నేలమట్టం కాగా.. మరో 514 భవనాలు తీవ్రంగా దెబ్బతిన్నట్లు వెల్లడించారు.
ప్రసంగాన్ని ఆపేసి పరామర్శకు
ఇస్తాంబుల్లో ఓ ప్రసంగానికి హాజరు కావాల్సిన అధ్యక్షుడు రెసెప్ తయ్యిప్.. తన పర్యటనను రద్దు చేసుకొని.. భూకంపం కారణంగా ఇలాజిగ్లో మరణించిన ఓ తల్లి, కుమారుడి అంత్యక్రియలకు హాజరయ్యారు. అటు పిమ్మట మాలత్యను సందర్శించారు.
బాధితులకు సహాయక చర్యలు చేపడుతున్నామని, వారికి అండగా ఉంటామని హామీ ఇచ్చారు. భవన శిథిలాల కింద చిక్కుకున్న 43మందిని సురక్షితంగా కాపాడింది సహాయక బృందం. ఇంకా 19మంది శిథిలాల కింద చిక్కుకున్నట్లు అనుమానిస్తున్నారు.
