బీరుట్లో జరిగిన భారీ పేలుళ్ల నేపథ్యంలో లెబనాన్ ప్రధాన మంత్రి హసన్ దియాబ్, ఆయన మంత్రివర్గం సోమవారం రాజీనామా చేశారు. ఘటనపై పెల్లుబికిన ప్రజాగ్రహంతోనే ఈ మేరకు నిర్ణయం తీసుకుంది ప్రభుత్వం. అధ్యక్ష భవనానికి వెళ్లి ప్రధాని తన మంత్రివర్గ రాజీనామాను సమర్పించారు. కొత్త ప్రభుత్వం ఏర్పాటుపై సుదీర్ఘ మంతనాలు జరిగే అవకాశముంది.
లెబనాన్కు ఔషధాలు, ఆహార పదార్థాలు, నిత్యావసర వస్తువులు తక్షణం పంపనున్నట్లు భారత్ తెలిపింది. ఐరాసలో భారత శాశ్వత ప్రతినిధి టి.ఎస్ తిరుమూర్తి ఈ విషయాన్ని వెల్లడించారు.
ప్రభుత్వ వ్యతిరేక నిరసనలు..
లెబనాన్లో ఆగస్టు 4న జరిగిన భారీ పేలుడుకు వ్యతిరేకంగా తీవ్ర స్థాయిలో నిరసనలు చేపట్టారు ప్రజలు. బీరుట్లోని ప్రభుత్వ కార్యాలయాలను చుట్టుముట్టేందుకు ప్రయత్నించారు. చాలా చోట్ల ఆందోళనకారులను చెదరగొట్టేందుకు భద్రతా బలగాలు బాష్పవాయువును ప్రయోగించాయి.
లెబనాన్లో 1990ల్లో జరిగిన పౌర ఉద్యమం తర్వాత ప్రస్తుత అధికార పార్టీనే పాలిస్తోంది. అయితే దియాబ్ ఇష్టం లేకపోయినా రాజీనామా చేయాల్సి వచ్చినట్లు తెలుస్తోంది. రెండు రోజుల క్రితం జాతినుద్దేశించి మాట్లాడిన దియాబ్.. సంస్కరణలను ప్రవేశపెట్టేందుకు రెండు నెలల సమయం కావాలని కోరారు. అయితే సొంత కేబినెట్ నుంచే ఒత్తిడి తీవ్రంగా ఉన్నట్లు తెలుస్తోంది.
ఇదీ చూడండి: సూపర్ మార్కెట్లో 'బీరుట్ పేలుళ్ల' భయానక దృశ్యాలు
