Tedros Adhanom on Covid: కొవిడ్-19 మహమ్మారి వెలుగులోకి వచ్చి మూడో ఏడాదిలోకి అడుగుపెడుతున్న క్రమంలో కీలక వ్యాఖ్యలు చేశారు ప్రపంచ ఆరోగ్య సంస్థ డైరెక్టర్ జనరల్ టెడ్రోస్ అధనోమ్ గెబ్రెయసెస్. దేశాల మధ్య అసమానతలను తొలగించి.. కలిసికట్టుగా పనిచేస్తే.. 2022లోనే ఈ మహమ్మారి అంతమవుతుందన్నారు.
"మహమ్మారి నుంచి ఏ దేశమూ బయటపడలేదు. అయితే, కట్టడి చేసేందుకు, చికిత్స అందించేందుకు చాలా కొత్త సాధనాలు ఉన్నాయి. సుదీర్ఘ కాలం పాటు దేశాల మధ్య అసమానతలు కొనసాగితే.. మనం నియంత్రించలేనంతగా, కనీసం అంచనా వేయలేనంతగా.. వైరస్ ప్రమాదకరంగా మారుతుంది. అసమానతలకు ముగింపు పలికితేనే.. ఈ మహమ్మారిని అంతం చేయగలుగుతాం. కొవిడ్-19 మహమ్మారి వచ్చి మూడో ఏడాదిలోకి అడుగుపెడుతున్న క్రమంలో.. ఈ సంవత్సరంలోనే దానికి ముగింపు ఉంటుందనే నమ్మకం ఉంది. కానీ, మనం కలిసికట్టుగా పోరాడితేనే అది సాధ్యమవుతుంది."
- టెడ్రోస్ అధనోమ్, డబ్ల్యూహెచ్ఓ అధినేత.
వచ్చే ఏడాది ప్రపంచం ఎదుర్కోబోయేది కొవిడ్-19 ఆరోగ్య ముప్పు ఒక్కటే కాదన్నారు టెడ్రోస్. లక్షలాది మంది ప్రజలు సాధారణ వ్యాక్సినేషన్, కుటుంబ నియంత్రణ సేవలు, పలు అంటువ్యాధులు, ఇతర వ్యాధులకు చికిత్సలకు దూరమయ్యారని గుర్తు చేశారు. ప్రపంచంలోనే తొలి మలేరియా వ్యాక్సిన్ను పెద్దఎత్తున అందించాలని కోరారు. అత్యవసరంగా, పెద్ద ఎత్తున వ్యాక్సినేషన్ చేపడితే.. ప్రతి ఏటా వేలాది మంది ప్రాణాలు కాపాడగలుగుతామని సూచించారు.
" పోలియో నిర్మూలనలో ఇంకా పూర్తిస్థాయిలో విజయం సాధించలేదు. రెండు దేశాల్లో ఐదు కేసులు నమోదయ్యాయి. మా భాగస్వామ్య సంస్థలు ఎబోలా, మార్బుర్గ్ వంటి ప్రపంచవ్యాప్తంగా ఎదురయ్యే సవాళ్లపై స్పందిస్తున్నాయి. భవిష్యత్తులో ఎదురయ్యే అంటువ్యాధులు, మహమ్మారులను కట్టడి చేసేందుకు కొత్త బయోహబ్ వ్యవస్థను ఏర్పాటు చేస్తున్నాం. బెర్లిన్లో పాండమిక్, ఎండమిక్ ఇంటెలిజెన్స్ హబ్ను ప్రారంభించాం. ప్రజారోగ్యంపై కొత్త ఆవిష్కరణల కోసం ఇది ఉపయోగపడుతుంది. "
- టెడ్రోస్ అధనోమ్, డబ్ల్యూహెచ్ఓ అధినేత
2022 మధ్య నాటికి ప్రపంచ జనాభాలో 70 శాతం మందికి వ్యాక్సిన్ అందించే లక్ష్యాన్ని సాధించేందుకు అన్ని దేశాలు కలిసికట్టుగా పని చేయాలని పిలుపునిచ్చారు టెడ్రోస్.
ఇదీ చూడండి:
