వివిధ రకాల స్ట్రెయిన్లు పుట్టుకొస్తూ ప్రపంచంలో అనేక చోట్ల కరోనా కలవరపెడుతున్న వేళ బ్రిటన్లో మరో ప్రమాదకర వైరస్ బయటపడింది. మంకీపాక్స్(Monkeypox)గా పిలిచే ఈ వ్యాధి వ్యాప్తిపై స్థానికుల్లో భయాందోళనలు వ్యక్తం అవుతున్నాయి. ఇప్పటివరకు నాలుగు మంకీపాక్స్ కేసులను అధికారులు గుర్తించగా తాజాగా మరో రెండు ఆ జాబితాలో చేరాయి.
ఉత్తర ఐర్లాండ్, యునైటెడ్ కింగ్డమ్లో ఈ మంకీపాక్స్ వ్యాప్తి రోజురోజుకూ పెరుగుతోంది. వైరస్ సోకిన వారికి ప్రస్తుతం ఇంగ్లాండ్లో చికిత్స అందిస్తున్నారు.
మంకీపాక్స్ అంటే?
మంకీపాక్స్ అనేది జంతువుల నుంచి మనుషులకు సోకుతుంది. సాధారణంగా మధ్య, పశ్చిమ ఆఫ్రికాల్లో ఈ వైరస్ వ్యాపించే అవకాశాలు ఎక్కువ. ఇది కరోనా తరహాలోనే ఒకరి నుంచి శ్వాసకోస బిందువుల ద్వారా సోకుంది. వ్యాధి సోకిన వారిని తాకినా.. మంకీపాక్స్ వ్యాపించే అవకాశం ఉంది. ఇది శరీరంలోకి పూర్తిగా వ్యాప్తి చెందడానికి సాధారణంగా 6 నుంచి 13 రోజులు పడుతుంది. ఒక్కోసారి 5 నుంచి 21 రోజుల సమయం కూడా పడుతుందని నిపుణులు వెల్లడించారు.
దీని లక్షణాలు ఏంటి?(Monkeypox symptoms)
జ్వరం, తలనొప్పి, వాపులు, నడుంనొప్పి, కండరాల నొప్పి, అలసట మంకీపాక్స్ లక్షణాలు. జ్వరం వచ్చే సమయంలో చర్మంపైన దద్దుర్లు కూడా ఏర్పడే అవకాశం ఉంది. ఇవి సాధారణంగా అరచేతులు, అరిపాదాల్లో వస్తుంటాయి. దీని ద్వారా విపరీతమైన దురద లేదా నొప్పి కలుగుతాయి. ఒక్కోసారి మచ్చలు కూడా ఏర్పడవచ్చు.
ఈ లక్షణాలు 14-21 రోజుల్లో బయటపడతాయి. మైల్డ్ కేసుల్లో లక్షణాలు కనించవు. ఇలాంటి సందర్భాల్లో ఓ వ్యక్తి నుంచి మరోవ్యక్తికి వ్యాప్తికి అవకాశాలు పెరుగుతాయి.
మరి దీనికి చికిత్స ఉందా?(Monkeypox treatment)
ప్రస్తుతం మంకీపాక్స్ను పూర్తిగా నయం చేసేందుకు సురక్షితమైన చికిత్స ఏదీ లేదని అమెరికాకు చెందిన సెంటర్స్ ఫర్ డిసీజ్ కంట్రోల్ అండ్ ప్రివెన్షన్ వెల్లడించింది. ఈ చికిత్సకు స్మాల్పాక్స్ వ్యాక్సిన్, యాంటీవైరల్స్ వంటి ఔషధాలు వాడొచ్చని సూచించింది.
ఇదీ చదవండి : కరోనాతో 243 రోజులు పోరాడినా..!
