బ్రిటన్ ప్రధాని థెరిసా మే త్వరలోనే తన రాజీనామా తేదీని ప్రకటిస్తారని కన్జర్వేటివ్ పార్టీకి చెందిన ఎంపీ గ్రాహమ్ బ్రాడీ వెల్లడించారు. అనంతరం భవిష్యత్ ప్రధాని కోసం మార్గనిర్దేశం చేస్తారని ఆయన స్పష్టం చేశారు.
బ్రెగ్జిట్ సమస్య పరిష్కారం కాగానే రాజీనామా సమర్పిస్తానని మార్చి నెలలో థెరిసా మే ప్రకటించారు. కానీ అంతకుముందే రాజీనామా చేయాలని స్వపక్షం నుంచి ఆమెపై ఒత్తిడి పెరుగుతోంది.
కన్జర్వేటివ్ పార్టీకి చెందిన '1922 కమిటీ'కి అధ్యక్షుడైన గ్రాహమ్ బ్రాడీ ఓ వార్తా సంస్థతో మాట్లాడారు. థెరిసా మే తన భవిష్యత్ ప్రణాళికలపై స్పష్టత ఇవ్వాలని కమిటీ కోరిందని, కమిటీ ముందు బుధవారం హాజరైన తరువాత ఆమె రాజీనామా విషయంలో స్పష్టత వస్తుందని ఆయన తెలిపారు.
"ప్రధానమంత్రిగా లేదా కన్జర్వేటివ్ పార్టీ నేతగా శాశ్వతంగా ఉండాలని థెరిసా మే కోరుకుంటున్నట్లు నేను భావించడం లేదు." - గ్రాహం బ్రాడీ, టోరీ ఎంపీ, కన్జర్వేటివ్ పార్టీ నేత
ఓటమి తప్పించుకోవడానికే..
ఇటీవల జరిగిన స్థానిక ఎన్నికల్లో థెరిసా మే నేతృత్వంలోని కన్జర్వేటివ్ పార్టీకి ఓటర్ల నుంచి తిరస్కారం ఎదురైంది. ఈ నెల 23న జరిగే యూరోపియన్ పార్లమెంట్ ఎన్నికల్లోనూ ఇదే ఫలితం రావచ్చని ఆ పార్టీ భయపడుతోంది. అందుకే ప్రధాని పదవి నుంచి థెరిసా మేని వైదొలగాలని విజ్ఞప్తి చేస్తోంది.
బ్రెగ్జిట్ దెబ్బ
ఐరోపా సమాఖ్య నుంచి బ్రిటన్ వైదొలిగే గడువు (బ్రెగ్జిట్) మార్చి 29 నుంచి అక్టోబర్ 31కి పొడిగించారు. అయితే థెరిసా మే బ్రెగ్జిట్ ఒప్పందాన్ని బ్రిటన్ పార్లమెంట్ ఇప్పటికే పలుమార్లు తిరస్కరించింది.
ఇదీ చూడండి: 'ఫోబియా'కు స్పైడర్మ్యాన్ 'ట్రీట్మెంట్'
