ఆ దేశంలో మహిళలకు ఉచితంగా నెలసరి వస్తువులు

నెలసరి సమయంలో పేదరికం కారణంగా స్కాట్లాండ్​ మహిళలు ఎదుర్కొంటున్న ఇబ్బందులు ఇకపై తొలిగిపోనున్నాయి. రుతుక్రమం సమయంలో మహిళలకు ఉచితంగా.. నెలసరి సంబంధిత వస్తువులు అందనున్నాయి. ఇందుకు సంబంధించిన ఓ బిల్లు.. ఆ దేశ పార్లమెంట్​లో ఏకగ్రీవంగా ఆమోదం పొందింది.

మహిళలకు అండగా సరికొత్త పథకానికి​ శ్రీకారం చుట్టింది స్కాట్లాండ్. నెలసరి సంబంధిత వస్తువులను ప్రభుత్వం తరఫున ఉచితంగా అందించనున్న తొలిదేశంగా నిలవనుంది. పీరియడ్స్​ సమయంలో తగిన సౌకర్యాలు వ్యతిరేకంగా ప్రపంచవ్యాప్తంగా జరుగుతున్న ఉద్యమంలో భాగంగా స్కాట్లాండ్​ ఈ నిర్ణయం తీసుకుంది. ఇందుకు సంబంధించిన బిల్లు.. ​ఆ దేశ పార్లమెంట్​లో మంగళవారం ఏకగ్రీవంగా ఆమోదం పొందింది.

కొత్త నిబంధనల ప్రకారం.. స్కాట్లాండ్​లోని మహిళలు, అమ్మాయిలకు పాఠశాలు, విశ్వవిద్యాలయాలు, ఇతర ప్రభుత్వ భవనాలలో ఉచితంగా నెలసరి వస్తువులు అందుతాయి. శానిటరీ న్యాప్కిన్స్​ను మహిళలకు అందుబాటులో ఉండేలా చూసే బాధ్యత స్థానిక అధికారులపై ఉంటుంది. గతేడాది ఈ బిల్లును మోనికా లీనన్​ అనే సభ్యురాలు.. పార్లమెంట్​లో ప్రవేశపెట్టారు. తాజాగా.. ఈ బిల్లు చట్టరూపం దాల్చడం పట్ల ఆమె హర్షం వ్యక్తం చేశారు.

"వాణిజ్య సంఘాలు, మహిళలకు రక్షణ కల్పించే స్వచ్ఛంద సంస్థల సహకారంతోనే ఈ చట్టం వచ్చింది. స్కాట్లాండ్​ ఒక్క దేశమే "పీరియడ్​ పావర్టీ"ని ఎదుర్కొన్న దేశంగా నిలిచిపోకూడదు. ప్రపంచవ్యాప్తంగా ఉన్న మహిళలందిరికీ నెలసరి వస్తువులు అందాలి."

-- మోనికా లీనన్​, స్కాట్లాండ్​ చట్టసభ సభ్యురాలు.

అత్యంత ప్రధానమైన బిల్లుకు మద్దతుగా ఓటు వేసినందుకు గర్వంగా ఉందని స్కాట్లాండ్​ మంత్రి నికోలా స్టర్జన్​ తెలిపారు. మహిళలు, అమ్మాయిల కోసం ఇది అత్యంత ప్రధానమైనదని ట్విట్టర్​ వేదికగా పేర్కొన్నారు.

2017లో సీఎన్ఎన్​ వార్తాసంస్థ నిర్వహించిన సర్వే ప్రకారం.. బ్రిటన్​లో పది మందిలో ఒకరు "పీరియడ్​ పావర్టీ"ని ఎదుర్కొంటున్నారని తేలింది. అందులో సగం మంది 14-21 ఏళ్ల వయస్సు ఉన్నవారే. ఈ కారణంగా సగం మంది అమ్మాయిలు.. పాఠశాల విద్యకు దూరమవుతున్నారని వెల్లడించింది.

ఇదీ చూడండి:క్రిస్మస్​ కోసం బ్రిటన్​లో ఆంక్షల సడలింపు