కరోనా మహమ్మారి ప్రపంచ దేశాలపై పంజా విసురుతోంది. వైరస్కు కేంద్ర బిందువైన చైనాలో అదుపులోకి వచ్చినప్పటికీ.. ఇతర దేశాల్లో మాత్రం కోరలు చాస్తోంది. ప్రపంచ వ్యాప్తంగా 158 దేశాలకు విస్తరించిన కరోనా 10,080మందిని బలి తీసుకుంది. సుమారు 2.32 లక్షల మంది వైరస్ బారిన పడ్డారు. ఐరోపాలో 4,932, ఆసియాలో 3,431 మంది ప్రాణాలు కోల్పోయారు.
ఈ నేపథ్యంలో వివిధ దేశాలు నివారణ చర్యల్లో భాగంగా కఠిన ఆంక్షలు విధిస్తున్నాయి. పూర్తిస్థాయిలో నగరాలను మూసివేస్తున్నాయి.
వివిధ దేశాల్లో పరిస్థితి ఇలా..
- ఇరాన్లో కరోనా మహమ్మారి వేగంగా విస్తరిస్తోంది. తాజాగా మరో 149 మంది ప్రాణాలు కోల్పోయారు. ఇప్పటి వరకు మృతి చెందిన వారి సంఖ్య 1,433కు చేరింది. 20వేల మంది ఈ వైరస్ బారినపడ్డారు.
- అగ్రరాజ్యం అమెరికాలోని వివిధ రాష్ట్రాలు వైరస్ వ్యాప్తిని అడ్డుకునేందుకు చర్యలు చేపట్టాయి. కాలిఫోర్నియాను శుక్రవారం పూర్తిగా స్తంభింపజేశారు అధికారులు. కొవిడ్-19 చికిత్సకు మలేరియా నిరోధక మందులు వాడుతున్నట్లు అధ్యక్షుడు డొనాల్డ్ ట్రంప్ ప్రకటించారు. ప్రపంచానికి వైరస్ గురించి తెలపడంలో చైనా నిర్లక్ష్యం చేసిందని ఆరోపించారు.
- వైరస్ పుట్టినిల్లు చైనాలో వరుసగా రెండో రోజు ఒక్క కొత్త కేసు కూడా నమోదు కాలేదు. డిసెంబర్లో తొలి వైరస్ కేసును గుర్తించిన తర్వాత చైనా కరోనాపై విజయం సాధించినట్లయింది. ఇప్పటి వరకు చైనాలో 3,248మంది మరణించారు.
- ఇటలీలో తాజాగా మరో 427 మరణాలు సంభవించాయి. దీంతో మృతుల సంఖ్య 3,405కు చేరింది. దేశవ్యాప్తంగా ఆంక్షలు విధించింది అక్కడి ప్రభుత్వం. ఐరోపాలోని వివిధ దేశాల్లోనూ ఏప్రిల్ 3 వరకు ఆంక్షలు కొనసాగనున్నాయని అధికారులు వెల్లడించారు.
- కరోనా వ్యాప్తిని అడ్డుకునే చర్యల్లో భాగంగా ఫ్రాన్స్లో విధించిన ఆంక్షలు మరో రెండు వారాలకు పెంచారు అధ్యక్షుడు ఇమ్మాన్యూయెల్ మెక్రాన్.
- అర్జెంటినాలో ఈ నెల 31వరకు దేశవ్యాప్తంగా షట్డౌన్ కొనసాగుతుందని ప్రభుత్వం స్పష్టం చేసింది. బ్రెజిల్లోని ప్రముఖ బీచ్లు, రెస్టారెంట్లు, బార్లు 15 రోజుల పాటు మూసివేశారు.
- రష్యాలో తొలి కరోనా మరణం సంభవించినట్లు ఆ దేశ ప్రభుత్వం ప్రకటించింది.
- ఆఫ్రికాలోని బర్కినా ఫాసోలో తొలి కరోనా మరణంతో సమీప దేశాలు నివారణ చర్యలు చేపట్టాయి. నైజీరియాలోని లాగోస్ నగరంలో పలు ఆంక్షలు విధించారు. పాఠశాలలు, దుకాణ సముదాయాలను మూసివేశారు.
ఇదీ చూడండి: ఫేస్బుక్, వాట్సాప్ సర్వర్లను వణికిస్తున్న కరోనా
