ఐరోపాలో లక్ష దాటిన కరోనా మరణాలు

కరోనా దెబ్బకు ప్రపంచం విలవిల్లాడుతోంది. కేసులు 23 లక్షలను మించిపోయాయి. మృతుల సంఖ్య లక్షా 60 వేలపైనే. ఐరోపాలో కొవిడ్​ తీవ్రంగా ఉంది. ఇక్కడే లక్షకుపైగా మరణాలు నమోదయ్యాయి. కొవిడ్​ ధాటికి అతలాకుతలమైన స్పెయిన్​లో లాక్​డౌన్​ను మే9 వరకు పొడిగిస్తున్నట్లు ప్రకటించారు ప్రధాని.

ప్రపంచవ్యాప్తంగా కరోనా కేసులు వేగంగా పెరిగిపోతున్నాయి. మొత్తం 23 లక్షలపైచిలుకు కేసులు నమోదవగా.. లక్షా 60 వేల మందికిపైగా వైరస్​కు బలయ్యారు. ఒక్క ఐరోపాలోనే లక్షమందికిపైగా ప్రాణాలు కోల్పోయారు. అమెరికాలో దాదాపు మరో 30 వేల కేసులు నమోదయ్యాయి. 24 గంటల వ్యవధిలో 1867 మంది మరణించారు.

స్పెయిన్​లో లాక్​డౌన్​ పొడిగింపు..

కరోనా ధాటికి తీవ్రంగా ప్రభావితమైన స్పెయిన్​లో కేసులు, మరణాలు క్రమక్రమంగా తగ్గుముఖం పడుతున్నాయి. 24 గంటల్లో అక్కడ 565 మంది మరణించగా.. మొత్తం మృతుల సంఖ్య 20 వేలు దాటింది. కేసులు 2 లక్షలకు చేరువయ్యాయి.

ఈ నేపథ్యంలో దేశవ్యాప్తంగా మార్చి 14 నుంచి అమల్లో ఉన్న లాక్​డౌన్​ను మే 9 వరకు పొడిగిస్తున్నట్లు ప్రకటించారు ప్రధాని పెడ్రో సాంచెజ్​. ఏప్రిల్​ 27 నుంచి స్వల్ప సడలింపులు ఉంటాయని స్పష్టం చేశారు.

ఇటలీలో స్థిరంగా...

ఇటలీలో కేసులు స్థిరంగా నమోదవుతున్నాయి. శనివారం మరో 3,400కుపైగా కరోనా బారినపడగా.. మరో 482 మంది మరణించారు. మొత్తం మృతుల సంఖ్య 23 వేల 227కు చేరింది. ఐరోపాలో ఒక దేశంలో ఇవే అత్యధిక మరణాలు. ఇక్కడ లాక్​డౌన్​ ఆరో వారం ముగింపునకు చేరుకుంటోంది.

ఫ్రాన్స్​లో..

శనివారం మరో 642 మంది కరోనాకు బలికాగా.. ఫ్రాన్స్​లో మొత్తం మృతుల సంఖ్య 19,323కు చేరింది. కేసులు ఇప్పుడిప్పుడే క్రమంగా తగ్గుతున్నాయి. మార్చి 17 నుంచి దేశం లాక్​డౌన్​లో ఉండగా.. మే 11 తర్వాత సడలింపులు కుదించే అవకాశమున్నట్లు అధ్యక్షుడు ఇమ్మాన్యుయేల్​ మేక్రాన్​ సంకేతాలిచ్చారు.

5 రెట్లు అధిక మరణాలు..

బ్రిటన్​లో శనివారం మరో 888 మంది మరణించారు. మొత్తం మృతుల సంఖ్య 15 వేల 464కు చేరింది. ఇప్పటివరకు 4 లక్షల 60 వేల మందికిపైగా కరోనా పరీక్షలు నిర్వహించగా.. లక్షా 14 వేలమందికి పాజిటివ్​గా తేలిందని వెల్లడించారు యూకే కమ్యూనిటీస్​ సెక్రటరీ రాబర్ట్​. బ్రిటన్​ రాణి ఎలిజబెత్​.. ఈ నెల 21న జరగాల్సిన తన 94వ పుట్టినరోజు వేడుకలను రద్దు చేసుకున్నారు.

బ్రిటన్​ వ్యాప్తంగా కేర్​ హోమ్స్​లో ఉంటున్నవారిలో దాదాపు 7500 మంది కరోనా కారణంగా మృతిచెందారని కేర్​ హోమ్స్​ నిర్వాహకుల సంఘం 'కేర్​ ఇంగ్లండ్​' పేర్కొంది. అధికారిక లెక్కల కంటే.. ఇది దాదాపు 5 రెట్లు ఎక్కువంటూ డైలీ టెలిగ్రాఫ్​ కథనం అందించింది.

• టర్కీలో మరో 121 మంది చనిపోగా.. మొత్తం 1890 మంది కొవిడ్​ కారణంగా మరణించినట్లు ఆరోగ్య మంత్రి తెలిపారు. మరో 3700 మందికిపైగా వైరస్​ సోకగా.. మొత్తం కేసుల సంఖ్య 82 వేలు దాటింది.
• సింగపూర్​లో శనివారం 942 కరోనా కేసులు నమోదయ్యాయి. భారత్​ తదితర దేశాల నుంచి వచ్చి డార్మెటరీల్లో ఉంటున్నవారిలోనే ఎక్కువగా ఈ కేసులు వెలుగుచూశాయి.
• నైజీరియా అధ్యక్షుడు మహ్మద్​ బుహారీ ప్రధాన సహాయకుడు కరోనా కారణంగా మృతి చెందినట్లు ప్రభుత్వ వర్గాలు తెలిపాయి.
• రష్యాలో మరో 40 మంది చనిపోగా.. మొత్తం మృతుల సంఖ్య 313కు పెరిగింది.
• పాకిస్థాన్​లో మొత్తం 7 వేల 600కుపైగా కరోనా బారినపడ్డారు. 143 మరణాలు నమోదయ్యాయి.
  

  .