ఇంటి అద్దెల పెరుగుదలపై జర్మనీ రాజధాని బెర్లిన్లో నిరసనలు వెల్లువెత్తాయి. వేలమంది బెర్లిన్వాసులు రోడ్లపైకి చేరి ఆందోళనలు చేపట్టారు. అద్దెల పెంపునకు నిరసనగా నినాదాలు చేశారు. బెర్లిన్లో ప్రైవేటు సంస్థల చేతిలోనే అపార్ట్మెంట్లు ఉండటం అద్దెలు పెరిగిపోవడానికి కారణమని ఆరోపించారు.
1989లో బెర్లిన్ సరిహద్దు గోడ కూలిపోయిన తరవాత నగరం ఆర్థికంగా వెనుకబడిన వారికి అనువైనదిగా, అతి తక్కువ అద్దెలు ఉన్న చోటుగా ఉండేది. ఆ సమయంలో బెర్లిన్కు కళాకారులు, బొహిమియా దేశస్థుల ప్రవాహం పెరిగింది.
బెర్లిన్కు ప్రభుత్వం తిరిగి వచ్చాక సాంకేతికరంగ, అంకుర పరిశ్రమలకు కేంద్రంగా మారి బెర్లిన్కు ప్రజాధారణ పెరిగింది. 2004 నుంచి ఇక్కడి జనాభా 3.39 మిలియన్ల నుంచి 3.6 మిలియన్లకు పెరిగింది. అదే సమయంలో ఇంటి అద్దెలు క్రమంగా పెరుగుతూ వచ్చాయి. ఇతర జర్మనీ నగరాలు, ఐరోపా రాజధానుల్లో అద్దెలు తగ్గుముఖం పట్టినప్పటికీ ఇక్కడ భారీగా పెరిగాయి.
బెర్లిన్లో 860 చదరపు అడుగుల అపార్ట్మెంట్ అద్దెకు తీసుకోవాలంటే 2018లో సగటు నెలవారీ ధర సుమారు వెయ్యి యూరోలుగా ఉంది.
"అద్దెలతో అధికంగా లాభపడుతున్న రాబందులపై పోరాటం చేసేందుకే నేను ఇక్కడకు వచ్చా. నిరంతరం అద్దెల పెరుగుదలను నివారించాలనుకుంటున్నా. ఒక బెర్లిన్వాసిగా అద్దెల పెంపుపై మాట్లాడితే సరిపోతుంది. బెర్లిన్లో జన్మించినందుకు నాకు ఆ హక్కు ఉంది." - మాలిస్ రాయ్ముండ్, బెర్లిన్ వాసి
నిరసనకారుల ప్రధాన లక్ష్యం బెర్లిన్లో అతిపెద్ద స్థిరాస్తి, నిర్మాణ సంస్థ డ్యూయిష్ వోహ్నెన్. ఈ సంస్థకు ఇక్కడ 1,11,500 అపార్ట్మెంట్లు ఉన్నాయి. వాటి మార్కెట్ విలువ సుమారు 15.2 బిలియన్ యూరోలు. బెర్లిన్లో మొత్తం 2 లక్షల 43 వేల అపార్ట్మెంట్లు ప్రైవేటు సంస్థల అధీనంలో ఉన్నాయి.