ప్రపంచవ్యాప్తంగా కరోనా వైరస్ విజృంభిస్తోంది. ప్రపంచ దేశాల్లో రోజురోజుకు పాజిటివ్ కేసులు భారీగా నమోదవుతున్నాయి. అటు మృతుల సంఖ్య కూడా భారీగా పెరుగుతోంది. ఇప్పటి వరకు 13,42,480 కరోనా పాజిటివ్ కేసులు నమోదయ్యాయి. మొత్తం 74,558మంది ప్రాణాలు కోల్పోయారు.
ఫ్రాన్స్ విలవిల...
వైరస్తో ఫ్రాన్స్ విలవిలలాడుతోంది. 24 గంటల వ్యవధిలో రికార్డు స్థాయిలో 833మంది మరణించారు. ఫలితంగా మొత్తం మృతుల సంఖ్య 8,911కు చేరింది. దేశవ్యాప్తంగా 98,010మంది వైరస్ బారినపడ్డారు. అయితే ఇది ఆరంభం మాత్రమేనని ఫ్రాన్స్ ఆరోగ్యశాఖ అధికారులు హెచ్చరిస్తున్నారు. ప్రజలు జాగ్రత్తగా ఉండాలని సూచిస్తున్నారు.
అమెరికాలో 10వేలు...
అగ్రరాజ్యం అమెరికాలో కరోనా మహమ్మారి తీవ్ర రూపం దాల్చింది. దేశంలో మృతుల సంఖ్య 10వేలు దాటింది. అటు పాజిటివ్ కేసులు(3,64,088) కుడా అదుపు లేకుండా పెరిగిపోతున్నాయి.
అమెరికాలో వైరస్ కేంద్రబిందువు న్యూయార్క్లో పరిస్థితులు ఇంకా విషమంగానే ఉన్నాయి. ఈ నేపథ్యంలో లాక్డౌన్ను ఏప్రిల్ 29వరకు పొడగిస్తూ నిర్ణయం తీసుకున్నారు గవర్నర్ ఆండ్రూ కౌమో.
నార్వేలో మాత్రం...
ఓ వైపు ప్రపంచ దేశాలు కరోనాతో వణికిపోతుంటే.. నార్వే మాత్రం తమ దేశంలో పరిస్థితులు అదుపులోనే ఉన్నాయని ప్రకటించింది. వైరస్ వ్యాప్తిచెందడం తక్కువగా ఉండటమే ఇందుకు కారణమని తెలిపింది. అయితే ఇప్పట్లో ఆంక్షలను సడలించబోమని పేర్కొంది.
ఇదీ చూడండి- కరోనాపై పోరు: భారత్కు అమెరికా భారీ ఆర్థిక సాయం
