భారత మాజీ నౌకాదళ అధికారి కుల్భూషణ్ జాదవ్ మరణశిక్షను నిలిపివేస్తూ అంతర్జాతీయ న్యాయస్థానం ఇచ్చిన తీర్పును భారత స్వాగతించింది. ఇది భారత విజయంగా అభివర్ణించింది.
కుల్భూషణ్ జాదవ్ మరణశిక్షపై పునఃసమీక్ష చేయాలని, అతనికి న్యాయవాదితో సంప్రదించుకునే అవకాశాన్ని కలిగించాలని పాకిస్థాన్ను ఐసీజే ఆదేశించింది. 'ఈ తీర్పు ఓ మైలురాయి' అని భారత విదేశాంగమంత్రిత్వశాఖ అభివర్ణించింది. ఐసీజే తీర్పును పాకిస్థాన్ వెంటనే అమలు చేయాలని కోరింది.
జాదవ్ విడుదలకు, భారత్కు రప్పించడానికి భారత్ తీవ్రంగా కృషిచేస్తుందని విదేశాంగ మంత్రిత్వశాఖ అధికార ప్రతినిధి రవీశ్కుమార్ తెలిపారు.
జాదవ్ కుటుంబ సభ్యులకు ఓదార్పు..
ఐసీజే తీర్పు వెలువరించిన వెంటనే విదేశాంగమంత్రి జైశంకర్.. జాదవ్ కుటుంబసభ్యులతో మాట్లాడారు. వారి ధైర్యాన్ని మెచ్చుకున్నారు.
చట్టం ప్రకారం నడుచుకుంటాం: పాక్
ఐసీజే తీర్పుపై స్పందించిన పాకిస్థాన్... కుల్భూషణ్ జాదవ్ కేసు చట్టం ప్రకారం కొనసాగుతుందని పేర్కొంది. పాక్.. అంతర్జాతీయ సమాజంలో భాద్యతాయుతమైన సభ్యదేశంగా జాదవ్ కేసు విషయంలో మొదటి నుంచి తన నిబద్ధతను కొనసాగిస్తూ ఉందని, ఆ దేశ విదేశాంగ కార్యాలయం తెలిపింది.
"ఐసీజే తీర్పు విన్న తరువాత, పాకిస్థాన్ ఇప్పుడు చట్టప్రకారం ముందుకుసాగుతుంది. జాదవ్ను నిర్దోషిగా విడుదల చేయాలన్న భారత్ విజ్ఞప్తిని ఐసీజే ఆంగీకరించలేదు."- పాక్ విదేశాంగ కార్యాలయం
కుల్భూషణ్ జాదవ్... భారత ప్రామాణిక వీసా లేకుండా హుస్సేన్ ముబారక్ పాటిల్ అనే నకిలీ పేరుతో తమ దేశంలో ప్రవేశించాడని పాకిస్థాన్ ఆరోపిస్తోంది. ఆయనపై గూఢచర్యం, ఉగ్రవాదం ఆరోపణలు మోపి, సైనిక న్యాయస్థానం ద్వారా ఉరిశిక్ష వేయాలని నిర్ణయం తీసుకుంది. దీనిపై ఆగ్రహించిన భారత్... ఐసీజేను ఆశ్రయించింది. తాజాగా భారత్కు అనుకూలంగా ఐసీజే తీర్పు వెలువరించింది.
ఇదీ చూడండి: అయోధ్య భూవివాదం కేసుపై నేడు సుప్రీం విచారణ
