పాకిస్థాన్ నుంచి వచ్చినట్లు అనుమానిస్తున్న ఓ గూఢచారి పావురాన్ని.. జమ్ముకశ్మీర్ కథువాలోని అంతర్జాతీయ సరిహద్దు వద్ద పట్టుకున్నారు స్థానికులు. ఆదివారం ఆ కపోతాన్ని స్థానిక పోలీసు స్టేషన్కు అందజేసినట్లు పేర్కొన్నారు. పక్షి కాలికి ఓ రింగు ఉందని.. దానిపై నంబర్లు ఉండటాన్ని అధికారులు గుర్తించారు. వెంటనే సైనిక అధికారులకు సమాచారం అందించారు.
పాక్ పనేనా..?
పక్షి ఓ రహస్య సందేశాన్ని(కోడెడ్ మెసేజ్) పట్టుకెళ్తున్నట్లు పేర్కొన్నారు ఆర్మీ అధికారులు. ప్రస్తుతం ఆ సమాచారాన్ని ఛేదించే పనిలో ఉన్నట్టు వెల్లడించారు. హిరానగర్ సెక్టార్లోని మన్యరి గ్రామంలోని స్థానికులు.. ఆ పక్షి పాక్ వైపు నుంచే వచ్చినట్లు తెలిపారు.
ఈ పావురం దాయాది దేశంలో శిక్షణ పొందినట్లు భావిస్తున్న అధికారులు.. ఘటనను తీవ్రంగా పరిగణించి విచారణ ప్రారంభించారు. సైనిక స్థావరాలకు సంబంధించిన సున్నితమైన సమాచారాన్ని సేకరించేందుకు వచ్చిందా? ఎవరైనా దేశంలో ఏదైనా అలజడి సృష్టించనున్నారా? అనే అంశాలపైనా దృష్టిసారిస్తున్నారు.
