పాకిస్థాన్ ఎన్నికల సంఘం (ఈసీపీ) మంగళవారం ఆ దేశ ప్రధానమంత్రి ఇమ్రాన్ ఖాన్‌తో పాటు ప్రముఖ రాజకీయ నేతలకు సంబంధించిన ఆస్తుల వివరాలను వెల్లడించింది. ఇమ్రాన్‌కు రూ. 10.8 కోట్ల ఆస్తులున్నాయని ప్రకటించింది.
ఆయనకు ఉన్న బనీ గలా ఎస్టేట్‌పై ఇమ్రాన్ ఈసీకి ఆసక్తికర విషయాన్ని వెల్లడించారు. ఈ ఎస్టేట్ తనకు కానుకగా వచ్చిందని ఇమ్రాన్ ఖాన్ తెలిపినట్లు ఈసీ ప్రకటించింది. ఆయన భార్య బుర్షా బీబీకి ఇదే ఎస్టేట్‌లో సొంత ఇల్లు, పాక్‌ప ట్టాన్‌, ఒకారాలో భూమి ఉంది.
ఇమ్రాన్‌కు మూడు ఫారెన్‌ కరెన్సీ ఖాతాలు ఉన్నాయని ఎన్నికల సంఘం పేర్కొంది. ఇంకా 150 ఎకరాల వ్యవసాయ భూమి, రూ.50,000 విలువ చేసే నాలుగు మేకలు ఉన్నాయని వెల్లడించింది.
జర్దారీనే టాప్...
పాకిస్థాన్ పీపుల్స్ పార్టీ(పీపీపీ) ఛైర్మన్ బిలవాల్ భుట్టో-జర్దారీ రాజకీయ నాయకుల్లో అత్యధికంగా రూ. 150 కోట్ల విలువైన ఆస్తుల్ని కలిగిఉన్నట్లు తెలిపింది ఈసీపీ.
పాక్ మాజీ అధ్యక్షుడు అసీఫ్‌ అలీ జర్దారీకి రూ.66 కోట్లు ఉన్నట్లు ఎన్నికల కమిషన్ వెల్లడించింది. నగదు అక్రమ చలామణి కేసుల్లో ఆయన ప్రస్తుతం కస్టడీలో ఉన్నారు. పీపీపీ నేత ఖుర్షీద్ షాకు రూ. 6 కోట్లు ఉన్నట్లు ఎన్నికల సంఘం ప్రకటించింది.
