రాష్ట్రపతి విమానానికి పాక్​ అనుమతి నిరాకరణ

భారత రాష్ట్రపతి రామ్​నాథ్​ కోవింద్​ ప్రయాణించే విమానానికి పాకిస్థాన్​ గగనతలం మీదుగా వెళ్లేందుకు ఆ దేశం అనుమతి నిరాకరించింది. ఈ మేరకు భారత అధికారుల వినతిని తిరస్కరిస్తున్నట్లు పాక్​ విదేశాంగ మంత్రి వెల్లడించారు.

పాకిస్థాన్ మరోసారి తన వక్రబుద్ధిని చాటుకుంది. ఐరోపా పర్యటనకు వెళతున్న భారత రాష్ట్రపతి రామ్‌నాథ్ కోవింద్‌ ప్రయాణించే విమానానికి పాక్​ గగనతలం మీదుగా వెళ్లేందుకు ఆ దేశం అనుమతి నిరాకరించింది.

రాష్ట్రపతి ఐరోపా పర్యటన నిమిత్తం పాక్‌ గగనతలం నుంచి వెళ్లడానికి ఆ దేశ అనుమతి కోరారు భారత అధికారులు. అయితే కోవింద్​ విమానం తమ గగనతలం మీదుగా వెళ్లేందుకు నిరాకరిస్తున్నట్లు పాక్ విదేశాంగ మంత్రి ఎస్​ఎం ఖురేషీ వెల్లడించారు. విదేశాంగ శాఖ తీసుకున్న నిర్ణయాన్ని పాక్​ ప్రధాని ఇమ్రాన్ ఖాన్ ఆమోదించినట్లు తెలిపారు.

కశ్మీర్​కు స్వయం ప్రతిపత్తి రద్దుతో నెలకొన్న ఉద్రిక్త పరిస్థితుల నేపథ్యంలో ఈ నిర్ణయం తీసుకున్నట్లు చెప్పారు ఖురేషీ. కశ్మీర్​పై భారత్​ నిర్ణయం తీవ్రమైన సమస్యగా పేర్కొన్న ఆయన​.. ఈ అంశాన్ని ఐరాస మానవ హక్కుల మండలి దృష్టికి తీసుకెళతామన్నారు.

3 దేశాల పర్యటన..

సోమవారం నుంచి ఐస్​ల్యాండ్​, స్విట్జర్లాండ్​, స్లోవేనియా పర్యటన చేపట్టనున్నారు రాష్ట్రపతి కోవింద్​. ఆయా దేశాధినేతలతో సమావేశమవుతారు. పుల్వామా దాడి సహా ఇతర ఉగ్రవాద ఘటనలపై భారత స్వరం వినిపించనున్నారు కోవింద్​.

ఇదీ చూడండి: 'ఆర్టికల్ 370' ప్రత్యేక ప్రతిపత్తి కాదు : డోభాల్