ప్రపంచంలోనే అత్యంత ఎత్తైన శిఖరంగా పేరొందిన మౌంట్ ఎవరెస్ట్.. తాజా ఎత్తును ప్రకటించనున్నట్లు తెలిపింది నేపాల్. ఏడాది పాటు సర్వే చేసిన గణాంకాలపై డిసెంబర్ 8న ప్రకటించనున్నట్లు ఆ దేశ సర్వే విభాగం అధికారులు మీడియాకు సమాచారం అందించారు.
"ఎవరెస్ట్ తాజా ఎత్తును ప్రకటించేందుకు మా కార్యాలయంలో మంగళవారం మధ్యాహ్నం ప్రత్యేక కార్యక్రమం చేపడుతున్నాం. ఈ సందర్భంగా సర్వేలో పాల్గొన్న సిబ్బందిని సత్కరించుకోనున్నాం. "
- సుశీల్ నర్సింగ్ రాజ్భండారి, సర్వే విభాగం డిప్యూటీ డైరెక్టర్ జనరల్.
2015లో వచ్చిన భూకంపంతో ఎవరెస్ట్ ఎత్తు 8,848 నుంచి తగ్గిపోయిందన్న ఊహాగానాల నేపథ్యంలో సర్వే చేపట్టింది నేపాల్. ఏడాది పాటు శిఖరం ఎత్తుపై సర్వే నిర్వహించారు అధికారులు. ఇందు కోసం చైనా సాయం తీసుకుంది. 2019లో చైనా అధ్యక్షుడు షీ జిన్పింగ్ నేపాల్ పర్యటన సందర్భంగా.. ఎవరెస్ట్ కొత్త ఎత్తును సంయుక్తంగా ప్రకటించేందుకు ఇరు దేశాలు ఒప్పందం కుదుర్చుకున్నాయి.
భారత సర్వే విభాగం 1954లో ఎవరెస్ట్ ఎత్తును కొలిచి 8,848 మీటర్లుగా తేల్చింది. అప్పటి నుంచి అవే గణాంకాలు ప్రామాణికంగా ఉన్నాయి.
ఇదీ చూడండి: ఎవరెస్ట్ శిఖరం ఎత్తు తగ్గిందా? త్వరలో ప్రకటన!
