ట్రంప్​తో మోదీ​ ఏం మాట్లాడారంటే..?

అమెరికా అధ్యక్షుడు డొనాల్డ్‌ ట్రంప్‌తో ప్రధాని నరేంద్ర మోదీ ఫోన్‌లో సంభాషించారు. సుమారు 30 నిమిషాల పాటు జరిగిన ఈ సంభాషణలో ఇరు దేశాల ద్వైపాక్షిక అంశాలపై చర్చించారు. ఉగ్రవాద నిర్మూలన, సీమాంతర ఉగ్రవాదం తదితర అంశాలపై అగ్రనేతలిద్దరూ చర్చించారు. భారత్​పై పాక్​ ప్రధాని చేస్తున్న దురుసు వ్యాఖ్యాలు శాంతికి విఘాతమని మోదీ​ అభిప్రాయపడ్డారు.

కశ్మీర్​లో 370 అధికరణ రద్దు అనంతరం భారత్​-పాక్​ మధ్య ఉద్రిక్తతలు తారస్థాయికి చేరాయి. ఈ విషయంపై తొలిసారి అగ్రదేశ అధ్యక్షుడు డొనాల్డ్​ ట్రంప్​తో భారత ప్రధాని నరేంద్ర మోదీ సంభాషించారు. ఇరు దేశాల ద్వైపాక్షిక సంబంధాలు సహా పలు కీలక విషయాలపై చర్చించారు. ముఖ్యంగా కశ్మీర్​ పరిణామం అనంతరం పాకిస్థాన్​ ప్రధాని ఇమ్రాన్​ ఖాన్​ చేసిన వ్యాఖ్యలు, అనుసరిస్తోన్న విధానాలపై ప్రధాని మోదీ అభ్యంతరం వ్యక్తం చేశారు.

సుమారు 30 నిమిషాల పాటు సాగిన ఈ ఫోన్​ సంభాషణపై ప్రధాని కార్యాలయం వరుస ట్వీట్లు​ చేసింది.

"అమెరికా అధ్యక్షుడు డొనాల్డ్​ ట్రంప్​, ప్రధాని మోదీ మధ్య ద్వైపాక్షిక, ప్రాంతీయ అంశాలు చర్చకు వచ్చాయి. ఈ సంభాషణ స్నేహపూర్వకంగా సాగింది. సరిహద్దుల్లో ఉగ్రవాద నియంత్రణ, హింసా, తీవ్రవాదం లేని వాతావరణం ఏర్పాటు ఆవశ్యకతను ప్రధాని మోదీ ముఖ్యంగా ప్రస్తావించారు. పేదరికం, నిరక్షరాస్యతపై పోరాడేందుకు కలిసి వచ్చే ఎవరితోనైనా నిబద్ధతతో సహకరిస్తామని మోదీ తెలిపారు." - ప్రధాని కార్యాలయం ట్వీట్​.

ఈ ఏడాది జూన్‌ నెలాఖరులో ఒసాకాలో జరిగిన జీ20 సదస్సులో ఇరు దేశాల మధ్య చర్చకు వచ్చిన అంశాలను ప్రధాని ఈ సందర్భంగా ప్రస్తావించారు.

శ్వేతసౌధం స్పందన...

మోదీ, ట్రంప్ ఫోన్​ సంబాషణపై శ్వేతసౌధం స్పందించింది.

"భారత్​-పాక్​ మధ్య నెలకొన్న ఉద్రిక్తతలు తగ్గించేందుకు.. ఇరు దేశాల్లోనూ శాంతియుత వాతావరణం కొనసాగడం చాలా ముఖ్యమని అధ్యక్షుడు ట్రంప్​ మోదీకి తెలిపారు.​ అమెరికా-భారత్​ మధ్య వాణిజ్య బంధం బలోపేతమవ్వాలని అధ్యక్షుడు ఆకాంక్షించారు." - శ్వేతసౌధం

• ఇదీ చూడండి: పాక్​ మాటలు అర్థరహితమైనవి:అఫ్గానిస్థాన్​