చైనా రాజధాని బీజింగ్కు చెందిన ఓ వ్యక్తి 10 నిమిషాల వ్యవధిలో ఒకటిన్నర లీటర్ల కూల్డ్రింక్ తాగాడు. ఆ తర్వాతే అసలు సమస్య మొదలైంది. తీవ్రమైన కడుపు నొప్పితో గంటల వ్యవధిలోనే బీజింగ్లోని చాయంగ్ ఆసుపత్రిలో చేరాడు. 18 గంటల పాటు మృత్యువుతో పోరాడిన ఆ 22ఏళ్ల వ్యక్తి చివరకు ప్రాణాలు విడిచాడు.
అలా 10 నిమిషాల్లో అన్ని లీటర్ల కూల్డ్రింక్ తీసుకోవడం వల్ల శరీరంలో గ్యాస్ అమాంతం పెరిగిపోయి కాలేయానికి ఆక్సిజన్ అందకపోవడమే.. అతడి మరణానికి కారణమని వైద్యులు భావిస్తున్నారు. "22ఏళ్ల వ్యక్తికి బీపీ ఒక్కసారిగా పడిపోయింది. గుండె వేగంగా కొట్టుకుంది. ఊపిరి తీసుకోవడం కష్టమైంది. అతడు బతికున్నప్పుడు చేసిన సీటీ స్కాన్లో కొన్ని విషయాలు బయటపడ్డాయి. పేగుల్లో గ్యాస్ పేరుకుపోయింది. అక్కడి నుంచి కాలేయంలోని పోర్టల్ వెయిన్(జీర్ణాశయ సిర)కు గ్యాస్ చేరింది. అందువల్ల ఆ ప్రాంతంలో ఆక్సిజన్ స్థాయిలు ఒక్కసారిగా పడిపోయాయి. చివరకు అతడు ప్రాణాలు కోల్పోయాడు" అని వైద్యులు తమ నివేదికలో వెల్లడించారు.
అంతకుముందు వరకు ఆ వ్యక్తికి ఎలాంటి ఆరోగ్య సమస్యలు లేకపోవడం గమనార్హం.
కారణం అదేనా?
చైనా వైద్యులు చెబుతున్న విషయాన్ని బ్రిటన్ వైద్యులు నమ్మలేకపోతున్నారు. కూల్డ్రింక్ తాగినంత మాత్రాన చనిపోతారా? అని అనుమానిస్తున్నారు. ఈ విషయంలో ఒక నిర్ణయానికి రావాలంటే వైద్యులు మరింత సమాచారాన్ని బయటపెట్టాలని అంటున్నారు లండన్ యూనివర్సిటీలో బయోకెమిస్ట్, ప్రొఫెసర్ నాథన్ డేవిస్. 'ఒకటిన్నర లీటరు సాఫ్ట్ డ్రింక్ తాగి మరణించాడంటే నమ్మశక్యంగా లేదు. ఇలా జరగడం దాదాపు అసంభవం. అతడి మరణానికి బ్యాక్టీరియల్ ఇన్ఫెక్షన్ కారణమై ఉంటుందన్నది నా అనుమానం. సాధారణంగా.. శరీరం లోపల గ్యాస్ ఏర్పడటానికి అదే కారణం' అని వివరించారు.
ఇదీ చూడండి:- భారీగా తగ్గిన ఆయుర్దాయం- రెండో ప్రపంచ యుద్ధం తర్వాత ఇప్పుడే..
