చరిత్రలో తొలిసారి జీ20 సదస్సుకు అతిథ్యమివ్వనున్న జపాన్ ప్రతిష్ఠను మరింత పెంచేలా ప్రత్యేక నిర్ణయం తీసుకున్నాయి అక్కడి శృంగార కేంద్రాలు. సదస్సు జరగనున్న ఒసాకా నగర చుట్టుపక్కల ప్రాంతాల్లోని శృంగార కేంద్రాలకు తాత్కాలికంగా తాళాలు వేసేందుకు స్వచ్ఛందంగా ముందుకొచ్చాయి. రెడ్ లైట్ ఏరియా ప్రతినిధులతో కూడిన 'తోబిట షించి అసోషియేషన్' ఈమేరకు ప్రకటన విడుదల చేసింది.
భారత్, అమెరికా,చైనా, రష్యా, దక్షిణాఫ్రికా, ఫ్రాన్స్ సహా ప్రపంచ దేశాల ప్రతినిధులు హాజరయ్యే ఈ సదస్సుకు ఎలాంటి అంతరాయం కలగకూడదనే ఈ నిర్ణయం తీసుకున్నట్లు స్పష్టం చేసింది.
"జీ20 సదస్సు చాలా పెద్ద కార్యక్రమం. ఈ సమావేశానికి హాజరయ్యే ఇతర దేశాల ప్రతినిధులకు ఏ చిన్న సమస్య తలెత్తినా అది సదస్సుకు అంతరాయం కలిగిస్తుందని మేం భావించాం. అందుకే శృంగార కేంద్రాలను తాత్కాలికంగా మూసివేయాలని నిర్ణయించుకున్నాం."
-తోబిట షించి అసోషియేషన్ ప్రతినిధి
ప్రపంచ అగ్రదేశాలు పాల్గొనే జీ20 సదస్సు... జూన్ 28, 29 తేదీల్లో జపాన్లో రెండు రోజుల పాటు జరగనుంది.
గతంలోనూ ఇలా...
గతంలోనూ ఇలాంటి నిర్ణయం తీసుకున్నాయి జపాన్లోని శృంగార కేంద్రాలు. 1995లో జరిగిన 'ఆసియా పసిఫిక్ ఎకనామిక్ కో-ఆపరేషన్' సదస్సును ఒసాకాలోనే నిర్వహించింది జపాన్ ప్రభుత్వం. ఈ సమావేశం సందర్భంగా నగర చుట్టుపక్కలున్న కొన్ని శృంగార కేంద్రాలు స్వచ్ఛందంగా కార్యకలాపాలు నిలిపివేశాయి. గతంలో కొన్ని మాత్రమే ఇందుకు ముందుకు రాగా ఇప్పుడు దాదాపు అన్ని కేంద్రాలు తాత్కాలికంగా కార్యకలాపాలు నిలిపివేయనున్నాయి.
ఇదీ చూడండి : లాభాలు అదుర్స్... మెరిసిన ఆర్థిక, ఐటీ షేర్స్
