భారత్పై పాక్ ప్రధాని ఇమ్రాన్ ఖాన్ తీవ్ర ఆరోపణలు చేశారు. పుల్వామా దాడి అనంతరం ఎలాంటి పరిణామాలు చోటుచేసుకున్నాయో.. అదే తరహాలో యుద్ధ వాతావరణాన్ని ఇప్పుడు సృష్టించాలని భారత్ చూస్తోందన్నారు. కశ్మీర్ సమస్య నుంచి ప్రపంచం దృష్టిని మరల్చేందుకే భారత్ ఇలా చేస్తోందని అభిప్రాయపడ్డారు ఇమ్రాన్. ఈ పరిస్థితులకు దీటుగా స్పందించాల్సిన అవసరముందంటూ పాక్ మీడియాతో మాట్లాడారు. మరోవైపు కశ్మీర్ విషయంలో మోదీ సర్కారు చర్యలకు ప్రతిగా పాకిస్థాన్ తీసుకున్న నిర్ణయాలకు ఆ దేశ పార్లమెంటు ఆమోదం తెలిపింది.
ఇమ్రాన్ వ్యాఖ్యలపై భారత విదేశాంగ శాఖ అధికార ప్రతినిధి రవీశ్ కుమార్ స్పందించారు. భారత అంతర్గత విషయాల్లో పాక్ జోక్యం చేసుకోరాదని స్పష్టం చేశారు.
తాలిబన్ల 'శాంతి' సూచన
కశ్మీర్ సమస్యను అఫ్గానిస్థాన్తో ముడిపెట్టొద్దని తాలిబన్ సంస్థ సూచించింది. జమ్ముకశ్మీర్లో హింసకు తావులేకుండా భారత్-పాక్ సంయమనం పాటించాలని ఆ సంస్థ ప్రతినిధి జబీలుల్లా ముజాహిద్ శుక్రవారం ఓ ప్రకటన విడుదల చేశారు.
చైనా స్పందన
భారత్, పాక్లు తమకు స్నేహపూర్వక మిత్రదేశాలని... కశ్మీర్ విషయంలో ఐరాస భద్రతా మండలి తీర్మానాలు, సిమ్లా ఒప్పందాన్ని అనుసరించి రెండు దేశాలు సమస్యను పరిష్కరించుకోవాలని సూచించింది.
కశ్మీర్ విషయమై మద్దుతు కోరేందుకు పాకిస్థాన్ విదేశాంగ మంత్రి మహమ్మూద్ ఖురేషీ చైనా వెళ్లారు. చైనా విదేశాంగ మంత్రి వాంగ్యూ తో ప్రత్యేకంగా భేటీ అయ్యారు. ద్వైపాక్షిక చర్చల ద్వారా ఉభయ దేశాలు సమస్యను పరిష్కారించుకోవాలని ఖురేషికి సూచించారు వాంగ్యూ.
