హాంకాంగ్ స్థానిక సంస్థల ఎన్నికల్లో ప్రజాస్వామ్య అనుకూల అభ్యర్థులు ఘన విజయం సాధించారు. గత కొన్ని నెలలుగా హాంకాంగ్లో జరుగుతున్న నిరసనలకు ప్రజల మద్దతును ఎన్నికల ఫలితాలు ప్రస్ఫుటం చేశాయి.
ఆదివారం జరిగిన ఎన్నికల్లో ఎన్నడూ లేనంత రికార్డు స్థాయిలో 71 శాతం పోలింగ్ నమోదైంది. సోమవారం ఉదయం వరకు వెలువడిన ఫలితాల ప్రకారం 18 కౌన్సిల్ జిల్లాల్లో ఊహించని విధంగా ప్రజాస్వామ్య అనుకూల అభ్యర్థులు మెజారిటీని సొంతం చేసుకున్నారు. మొత్తం 452 స్థానాలకు గానూ 201 స్థానాల్లో ప్రజాస్వామ్య అనుకూల అభ్యర్థులు గెలుపుబావుటా ఎగరేశారు.
హాంకాంగ్లో అతిపెద్ద బీజింగ్ అనుకూల పార్టీ 182 మంది అభ్యర్థులను బరిలోకి దింపగా... ఊహించని రీతిలో 155 మంది ఓటమి పాలయ్యారు. ఈ ఫలితాలతో బీజింగ్కు, హాంగ్కాంగ్ ముఖ్య కార్యనిర్వాహణ అధికారి కారీ లామ్కు గట్టి దెబ్బ తగిలింది.
చైనాకు నేరస్థుల అప్పగింత బిల్లుకు వ్యతిరేకంగా కొద్ది నెలల క్రితం హాంగ్కాంగ్లో నిరసనలు ప్రారంభమయ్యాయి. ఆ నిర్ణయాన్ని ప్రభుత్వం వెనక్కి తీసుకున్నప్పటికీ పలు డిమాండ్లతో ఆందోళనకారులు ప్రదర్శనలు కొనసాగిస్తున్నారు.
ఇదీ చూడండి:చిన్న రైతులు పెద్ద భరోసా...
