భారీ మంచు శిల్పాల అందాలు, రంగురంగుల విద్యుత్ కాంతుల దగదగలతో చైనాలోని ముదాంజియాంగ్ ఉద్యానవనం మెరిసింది. హీలాంగ్జియాంగ్ రాష్ట్రంలోని ఈ పార్కు 19వ వార్షికోత్సవం సందర్భంగా మంచు శిల్పాలను ఏర్పాటు చేశారు.
60 వేల చదరపు మీటర్ల విస్తీర్ణం గల ఈ పార్కులో.. 80 రకాల మంచు శిల్పాలను రూపొందిచారు. 'టామ్ అండ్ జెర్రీ', 'లాస్ట్ నైట్' వంటి కార్టూన్ తరహా పాత్రలకు సంబంధించిన మంచు శిల్పాలు వీక్షకులను అమితంగా ఆకట్టుకుంటున్నాయి. ఈ అద్భుత దృశ్యాలను తమ చరవాణిలో బంధించేందుకు పర్యటకులు పోటీ పడుతున్నారు.
"నేను ముదాంజియాంగ్కు రావడం ఇదే తొలిసారి. ఇక్కడ మంచు శిల్పాలను ప్రదర్శనకు ఉంచారని తెలిసి చూడటానికి వచ్చాను. ఇంత పెద్ద మంచు బొమ్మలను చూడటం నా జీవితంలో ఇదే మొదటి సారి."
-జిన్ లాన్, పర్యటకురాలు
ఈ మంచు వనాన్ని 2001లో ముదాంజియాంగ్ నగరంలో ప్రారంభించారు. ఈ ప్రాంతం చైనా మంచు నగరంగా ప్రసిద్ధి చెందింది. ఏటా ఈ పార్కును సందర్శించేందుకు దేశ విదేశాల నుంచి వేలాది మంది పర్యటకులు వస్తుంటారు.
ఇదీ చదవండి:భళా రివన్.. భారత్ టు అమెరికా వయా 'సాట్'
