అత్యధిక కాలం జీవించి ఉన్న పురుషుడిగా జపాన్కు చెందిన చిటేషు వాటనేబ్ ప్రపంచ గిన్నిస్ రికార్డు నెలకొల్పాడు. ఇతని వయస్సు 112 ఏళ్ల 344 రోజులు. గతంలో ఈ రికార్డు ఇదే దేశానికి చెందిన మసాజో పేరిట ఉంది. అతను జనవరిలో మరణించిన కారణంగా రికార్డు చిటేషు వశమైంది.
1907లో జన్మించి...
ఉత్తర జపాన్-నీగాటాలో 1907లో జన్మించిన చిటేషు వాటనేబ్... అదే నగరంలో గల ఓ ఆసుపత్రి నుంచి ఇటీవలే తన జనన ధ్రువీకరణ పత్రాన్ని పొందాడు. వ్యవసాయ విద్యలో పట్టభద్రుడయ్యాక.. చెరకు పరిశ్రమల్లో పనిచేసేందుకు తైవాన్ వెళ్లాడు. 18 ఏళ్ల పాటు అక్కడే నివసించిన చిటేషు.. మిత్సూయీ అనే మహిళను వివాహమాడారు. వీరికి ఐదుగురు సంతానం.
కోపం వద్దు - నవ్వే ముద్దు...
రెండో ప్రపంచ యుద్ధం ముగిసిన తరవాత తన స్వస్థలానికి వచ్చాడు వాటనేబ్. పదవీ విరమణ వరకూ ప్రభుత్వ పాలకవర్గంలో పనిచేశాడు. అనంతరం కుటుంబంతోనే గడుపుతూ.. తన పొలంలోనే కూరగాయలు, పండ్లను పండించేవాడు. దశాబ్దం కిందటి వరకు వాటనేబ్ జపనీస్ సంప్రదాయ కళల్లో భాగంగా.. బొన్సాయ్ చెట్లను పెంచుతుండేవాడు.
తన దీర్ఘకాల జీవిత రహస్యం గురించి అడగ్గా... 'ఎలాంటి పరిస్థితుల్లోనైనా కోపాన్ని దరిచేరనీయకుండా, నవ్వుతూ ఉండాలి' అని సలహా ఇచ్చాడు వాటనేబ్.
అయితే ప్రస్తుతం అత్యధిక వయస్సు కలిగిన మహిళ రికార్డు కూడా జపాన్కు చెందిన బామ్మ పేరిటే ఉంది. 117 ఏళ్ల కానే తనాకా అనే వృద్ధురాలు.. భూమిపై అత్యధిక కాలం జీవించి ఉన్న మహిళగా రికార్డు నెలకొల్పింది.
ఇదీ చదవండి: కరోనాపై కోపం- ఒంటికి బాంబులు కట్టుకుని, పెట్రోల్ పోసుకుని..
