ఒక్క ఔషధంతో కొవిడ్ను అడ్డుకునే దిశగా ఆస్ట్రేలియా-అమెరికా శాస్త్రవేత్తల బృందమొకటి పురోగతి సాధించినట్టు తెలుస్తోంది. గ్రిఫిత్ యూనివర్సిటీకి చెందిన మెంజీస్ హెల్త్ ఇన్స్టిట్యూట్ నేతృత్వాన తయారుచేసిన ప్రత్యేక ఔషధాన్ని ఎలుకలపై ప్రయోగించగా, మంచి ఫలితాలు వచ్చాయట. జీవ కణాల్లోకి ప్రవేశించిన వైరస్ అభివృద్ధి చెంది, సంతతిని పెంచుకోకుండా ఈ మందు అడ్డుకుంటుందని సంబంధిత వర్గాలు వెల్లడించాయి. ఎలుకలపై పరీక్షలు నిర్వహించగా.. వైరస్ పార్టికల్స్ 99.9 శాతం మేర క్షీణించాయని, మనుషుల్లోనూ ఇదే ఫలితం వచ్చే అవకాశం ఉందని అభిప్రాయపడ్డాయి. కరోనా బాధితులకు ఐదు రోజుల పాటు నిత్యం ఇంజెక్షన్ రూపంలో ఇవ్వడం ద్వారా కొవిడ్కు అడ్డుకట్ట వేయొచ్చని తెలిపాయి. మనుషులపై ప్రయోగ పరీక్షలు పూర్తికావడానికి మరికొంత సమయం పడుతుందని వెల్లడించాయి.
వైరస్లోని చాలా భాగాల్లో (పార్టికల్స్లో) కరోనాకు సంబంధించిన సమాచారమే ఉంటుంది. దాని ఆర్ఎన్ఏ, డీఎన్ఏ రహస్యాలను ఈ పార్టికల్స్ మనిషిలోని జీవకణాలకు బదిలీ చేసి, వాటిని కూడా వైరస్గా మార్చేందుకు తోడ్పడతాయి. పరిశోధకులు రూపొందించిన ఔషధం.. ఈ వైరస్ భాగాలపై దాడిచేసి, షార్ట్/స్మాల్ ఇంటర్ఫెరింగ్ ఆర్ఎన్ఏ సమాచారాన్ని బదిలీ చేయకుండా వాటిని అడ్డుకుంటుందట! తద్వారా వైరస్ సంతతి పెరగదని నిపుణులు చెప్తున్నారు. ఎలాంటి రకం కరోనా వైరస్కైనా ఈ సాంకేతికత పనిచేస్తుంది కాబట్టి.. ఈ ఔషధం అన్ని రకాల స్ట్రేయిన్ల నుంచి విముక్తి పొందడానికి సహాయపడుతుందని వివరించారు.
ఇదీ చదవండి : 'భారత్లో 13% తగ్గిన కరోనా కేసులు.. కానీ..'
