కోర్టులో 'నరమేధం' ముష్కరుడు

న్యూజిలాండ్​లోని ​క్రైస్ట్​చర్చ్, లిన్​మోర్ మసీదులపై కాల్పులకు తెగబడిన దుండగుడిని హత్యానేరం కింద కోర్టులో హాజరుపరిచారు పోలీసులు. భారీ భద్రత మధ్య విచారణ చేపట్టింది న్యాయస్థానం. తదుపరి విచారణను ఏప్రిల్​ 5కు వాయిదా వేసింది.

క్రైస్ట్​చర్చ్, లిన్​మోర్ మసీదులపై మారణహోమం సృష్టించిన దుండగుడిని సంకెళ్లతో న్యాయస్థానానికి తీసుకువచ్చారు పోలీసులు. ఈ దాడిలో 49 మంది మృతి చెందారు. అతివాద భావజాలానికి ప్రేరేపితుడైన బ్రెంటన్​​ టారంట్​ను హత్యానేరం కింద కోర్టులో హాజరుపరిచారు. కోర్టు ఆవరణలో భారీ భద్రత ఏర్పాటు చేశారు. అతనిపై ఉన్న అభియోగాన్ని చదివి వినిపించిన న్యాయమూర్తి తదుపరి విచారణను ఏప్రిల్​ 5కు వాయిదా వేశారు.

ఆస్ట్రేలియాకు చెందిన బ్రెంటన్​ టారంట్​ నేరస్థుల దుస్తుల్లో కనిపించాడు. కోర్టు తనపై హత్యాభియోగాలు మోపుతున్నప్పటికీ బ్రెంటన్ నిశ్శబ్దంగానే ఉన్నాడు. నిందితుడిపై మరిన్ని నేరాభియోగాలు చేసే అవకాశం ఉంది. తదుపరి విచారణ వరకు నిందితుడు పోలీసుల కస్టడీలోనే ఉండాలని ఆదేశించింది కోర్టు.

తుపాకీ లైసెన్స్​ కఠినతరం

మసీదులపై జరిగిన దాడిని ఉగ్రచర్యగా పేర్కొన్నారు న్యూజిలాండ్​ ప్రధాని జసిండా అర్డెర్న్​. కాల్పులకు పాల్పడిన వ్యక్తి 2017,నవంబర్​లో తుపాకీ లైసెన్స్​ తీసుకున్నట్లు తెలిపారు. చట్టపరంగా రెండు సెమి ఆటోమేటిక్​ ఆయుధాలు, రెండు తుపాకులు, మరొక చిన్న తుపాకీని కొనుగోలు చేసినట్లు పేర్కొన్నారు. టారెంట్​పై ఇప్పటివరకు ఎటువంటి నేరచరిత్ర లేదని వెల్లడించారు.

లైసెన్స్​ పొందిన తుపాకులతో నరమేధానికి పాల్పడటంపై స్పందించారు జసిండా అర్డెర్న్​. దేశ తుపాకీ (ఆయుధ)చట్టాలను మరింత కఠినతరం చేస్తున్నట్లు ప్రకటించారు. ​

"ఇలాంటి దాడులు పునరావృతం కాకుండా తుపాకీ లైసెన్సులపై చర్చించి కీలక నిర్ణయం తీసుకుంటాం. కానీ మీకు ఒకటి స్పష్టం చేయాలనుకుంటున్నా. మన తుపాకీ లైసెన్స్​ చట్టాలు కచ్చితంగా మారతాయి."
- జసిండా అర్డెర్న్​, న్యూజిలాండ్​ ప్రధాని.

ఇదీ చూడండీ:ఉగ్ర నరమేధానికి 49 మంది బలి