షింజియాంగ్లో జరుగుతున్న మానవ హక్కుల ఉల్లంఘనలపై వస్తున్న వార్తలను ధ్రువీకరించేందుకు సరైన రీతిలో దర్యాప్తు జరగాలన్న యూఎన్హెచ్ఆర్సీ పిలుపును సున్నితంగా తిరస్కరించింది చైనా. ఐరాస మానవ హక్కుల హైకమిషనర్ మిచెల్ బచెలెట్ స్నేహపూర్వక సందర్శనకు రావొచ్చని, తప్పు జరుగుతోందన్న అంచనాలతో దర్యాప్తు చేసేందుకయితే రావొద్దని స్పష్టం చేసింది.
జెనీవా వేదికగా జరిగిన ఐరాస మానవ హక్కు మండలి 47వ సాధారణ సభలో మాట్లాడుతూ కీలక వ్యాఖ్యలు చేశారు బచెలెట్ 'షింజియాంగ్ ఉయ్గుర్ స్వయంప్రతిపత్తి ప్రాంతంలో పర్యటన, సరైన విధంగా సమాచారం పొందటం కోసం చైనాతో నేను చర్చలు కొనసాగిస్తున్నా. ముఖ్యంగా తీవ్రంగా మానవహక్కుల ఉల్లంఘనలు కొనసాగుతున్నట్లు పలు నివేదికలు వస్తున్న క్రమంలో.. ఈ ఏడాదే అది జరుగుతుందనే నమ్మకం ఉంది.' అని పేర్కొన్నారు.
బచెలెట్ వ్యాఖ్యలపై విలేఖరులు ప్రశ్నించగా స్నేహపూర్వకంగా సందర్శించొచ్చని తెలిపారు డ్రాగన్ విదేశాంగ శాఖ ప్రతినిధి ఝావో లిజియాన్.
"యూఎన్ మానవ హక్కుల విభాగం అధినేత.. షింజియాంగ్ సంబంధిత అంశాలపై చేసిన వ్యాఖ్యలు నిజాలకు విరుద్ధంగా ఉన్నాయి. చైనాలోని షింజియాంగ్ ప్రాంతాన్ని సందర్శించేందుకు హైకమిషనర్ను స్వాగతిస్తున్నాం. ఈ అంశంపై చర్చిస్తున్నాం. ఈ పర్యటన ద్వైపాక్షిక సంబంధాలు, సహకారాన్ని పెంపొందించటమే లక్ష్యంగా ఉండాలి. కానీ, తప్పు జరుగుతోందన్న అంచనాలతో దర్యాప్తు చేపట్టాలనే ఉద్దేశంతో మాత్రం ఉండకూడదు. ఈ విషయంపై రాజకీయం చేయాలనే ఏ ప్రయత్నాన్ని సహించబోం. చైనా అభివృద్ధిని అడ్డుకునేందుకు కొన్ని దేశాలు అబద్ధాలు, తప్పుడు సమాచారాన్ని వ్యాప్తి చేస్తున్నాయి. వారి ప్రయత్నాలు ఎప్పటికీ ఫలించవు. "
- ఝావో లిజియాంగ్, చైనా విదేశాంగ శాఖ ప్రతినిధి
షింజియాంగ్ రాష్ట్రంలో జరుగుతున్న హింసాత్మక దాడులకు ఈస్ట్ తుర్కిస్థాన్ ఇస్లామిక్ మూవ్మెంట్ కారణమని ఆరోపించింది చైనా. 2013లో బీజింగ్లో జరిగిన దాడికి వారే కారణమని తెలిపింది.
42 దేశాల ఆందోళన..
ఉయ్గుర్ల మారణహోమంపై ఐరాస మానవ హక్కుల మండలిలో ఆందోళన వ్యక్తం చేస్తూ 42 దేశాల తరఫున సంయుక్త ప్రకటన చేసింది కెనడా. స్వతంత్ర పరిశీలకులను వెంటనే అనుమతించి సమాచారం సేకరించేందుకు చైనా సహకరించాలని డిమాండ్ చేసింది. ఈ ప్రకటనకు జర్మనీ, ఫ్రాన్స్, ఇటలీ, జపాన్, ఆస్ట్రేలియా, బ్రిటన్, స్పెయిన్, అమెరికా వంటి అగ్ర దేశాలు మద్దతు ప్రకటించాయి. ఉయ్గుర్లు, ఇతర మైనారిటీలను నిర్బంధించటాన్ని ఆపేయటం సహా జాతి వివక్షతను రూపుమాపేందుకు కమిటీని ఏర్పాటు చేయాలని కోరింది కెనడా.
ఇదీ చూడండి: రక్షణ శాఖ వెబ్సైట్ల హ్యాకింగ్కు చైనా యత్నం!
