కరోనా విజృంభణతో ప్రపంచ దేశాలు తీవ్ర ఇబ్బందులను ఎదుర్కొంటున్నాయి. ఆర్థిక వ్యవస్థలు దెబ్బతిన్నాయి. అయితే.. అక్టోబర్లో చైనా ఎగుమతులు భారీగా పెరిగాయి. తొలిసారి కరోనా ముందున్న స్థాయికి చేరుకున్నాయి.
చైనా కస్టమ్స్ విభాగం విడుదల చేసిన గణాంకాల ప్రకారం.. అక్టోబర్లో ఎగుమతులు 11.4 శాతం వృద్ధితో 237.2 బిలియన్ డాలర్లకు చేరుకున్నాయి. సెప్టెంబర్లో ఎగుమతులు 9.9 శాతం పెరిగాయి. ఇదే సమయంలో దిగుమతులు 4.7 శాతం పెరిగి 178.7 బిలియన్ డాలర్లుగా ఉన్నాయి. అయితే.. అంతకు ముందు నెలలో(13.2 శాతం)తో పోలిస్తే దిగుమతులు భారీగా తగ్గటం గమనార్హం.
కరోనా వ్యాప్తి తర్వాత సత్వరం చైనా ఆర్థిక, సామాజిక కార్యక్రమాలు తిరిగి ప్రారంభమవటం, మాస్కులు, ఇతర ఔషధాలు, వస్తువులకు డిమాండ్ పెరగటం వల్ల చైనా ఎగుమతులకు ఊతమందింది.
2020లో 10 నెలల కాలంలో మొత్తం ఎగుమతులు క్రితం ఏడాదితో పోలిస్తే.. 0.5 శాతం వృద్ధితో 2 ట్రిలియన్ డాలర్లకు చేరుకున్నాయి. ఏప్రిల్ నుంచి ఎగుమతుల్లో సానుకూల ఫలితాలు కనిపిస్తున్నాయి. అయితే.. తొలి త్రైమాసికంలో 13.3 శాతం మేర క్షీణించాయి.
అమెరికాకు ఎగుమతులు..
అక్టోబర్ నెలలో అమెరికాకు చైనా ఎగుమతులు భారీగా పెరిగాయి. 22.5 శాతం మేర పెరిగి.. 43.8 బిలియన్ డాలర్లకు చేరుకున్నాయి. సెప్టెంబర్లో 20.5 శాతం వృద్ధి నమోదైంది. ఇదే సమయంలో అమెరికా నుంచి దిగుమతులు 33.4 శాతం మేర పెరిగి 12.5 శాతం బిలియన్ డాలర్లకు చేరాయి. ఇదే క్రమంలో అమెరికాతో రాజకీయంగా సున్నితమైన వాణిజ్య అంతరం 18.5 శాతం పెరిగి 31.4 బిలియన్ డాలర్లకు చేరుకుంది.
పుంజుకున్న ఆర్థిక వ్యవస్థ..
కరోనాతో అమెరికా, ఐరోపా, జపాన్ల ఆర్థిక వ్యవస్థలు క్షీణించిన సమయంలో చైనా జీడీపీ భారీగా పెరగటం గమనార్హం. చైనాలో 2020 ప్రారంభంలో చైనా మహమ్మారి కట్టడికి విధించిన ఆంక్షలతో.. పరిశ్రమలు, దుకాణాలు, కార్యాలయాలు మూసివేయటం వల్ల ఆర్థిక వ్యవస్థ 6.8 శాతం మేర క్షీమించింది. అయితే.. రెండో త్రైమాసికంలో ఆర్థిక కార్యకలాపాలు ప్రారంభమవటం వల్ల పుంజుకుని 3.2 శాతం వృద్ధి సాధించింది. సెప్టెంబర్తో ముగిసిన త్రైమాసికంలో 4.9 శాతానికి చేరుకుంది.
ఇదీ చూడండి: వృద్ధి రేటులో చైనా అనూహ్య రికవరీ
